Zibilizazio garatua omen gurea, aurrerapenez gainezka, begirune eta elkartasun gosez hilzorian den arren. Non herrialde batzuek besteak zapaltzen dituzten inpunitate osoz eta gizakiak gizakia esplotatzen duen norbere interesen poderioz.

Hamaika herri munduan barna, ehunka eraso, milaka hildako, milioika negar malko. Txikienen maitasuna, duintasuna, bakea izateko gerrara kondenatuta, gorrotoa, ezintasuna. Hauen aurrean handien harrokeria, berekoikeria, gerra justifikatzeko bakea aipatuta, anbizio ase ezina. Mendekua, Talionen legea, hilkutxan zibil errugabea, gero eta urrunago konponbidea. David eta Goliath-en borroka amaigabea. Eta bitartean zenbat herri suntsiturik, zenbat giza eskubide urraturik, zenbat sarraski ezkutaturik nahiz ahazturik, zenbat belaunaldi bakea ezagutu barik. Gatazkan jaio, bizi eta hil.

Gerra lekuetatik urrun, kaos honen guztiaren erantzule diren korporazio erraldoi eta politikari ankerrak gustura, euren hegemonia eta ekonomia bermatzeko edozer egiteko gauza, guztion gainetik pasatzeko zain. Daños colaterales direlakoak hainbaten ahotan; gizatasuna galdurik diru jariotan. Kolonialismoa, inperialismoa, totalitarismoa, gerra santua, merkatu ekonomia, demokrazia... berdin dio nola deitu edo noren izenean aritu. Doktrina bat predikatu eta alderantzizkoa aplikatzen dute, gainerako biztanleon patuarekin xakean jolastuz.

Bizitzen jarraitu nahi duten herrien adorea: Kurdistan, Armenia, Palestina, Libano, Afganistan, Tunez, Sahara, Hego Afrika, Kosovo, Txetxenia, India, Ekialdeko Timor, Vietnam. Bolivia, Haiti, Panama, Kuba, Nikaragua, Txile, Venezuela, Uruguay, Argentina. Flandria, Quebec, Irlanda, Bretainia, Korsika, Sardinia, Eskozia, Asturies, Galiza, Paissos Catalans, Euskal Herria...

Boterearekin itsu, besteen bizitzaren jabe egitea beste helbururik ez duen prepotentea: AEBak, Britainia Handia, SESB edo Errusia, Jugoslavia, Txina, Japonia, Alemania, Italia, Espainia, Frantzia, Maroko zein Turkia.

Ustez unibertso osoko nagusi eta Jaungoikoaren pare den lehen potentzia, zuzenean herriak bonbardatuz ala zeharka, militarren estatu kolpeak antolatu eta finantzatuz. Oraindik jatorri kolonizatzailea ahantzi ezin dutenak. Euren arraza, etniaren hedapenagatik aritzen direnak. Iragana azkarregi alboratuz, borrero bihurtutako biktimak. Inperio handi bilakatzeak balore oro galarazi dienak.

Ahulenari eraso eginez, inbaditzailea inbadituaren aurka; norbere indarra neurtzeko, inbaditzailea inbaditzailearen aurka; desesperazioak gain hartuta, inbaditua inbadituaren aurka. Inbaditu ohiak inbaditzaile, inbaditzaile ohiak inbaditu; Lagunak etsai, etsaiak lagun. Eromena. XXI. mendea: Potentziak gero eta indartsuago; hauen menpeko herriak gero eta menpekoago. Etsipena.

Davidek azkenean irabazi egin zion, ordea, Goliathi. Apurra bada ere, itxaropena.