«Time» aldizkari estatubatuarrari emandako elkarrizketan, «erantzukizunez» jokatuz bere agintaldiko lehenengo bi urteetan Guantanamoko presondegia itxi nahi duela adierazi du Barack Obamak. Ameriketako Estatu Batuetako presidente hautatuak 2010eko azaroan egingo diren Legebiltzarrerako hauteskundeak jarri ditu epemugatzat.

Hainbat erakundek salatu dute han giza eskubideak nabarmen urratzen dituztela, eta Obamak berak hauteskunde kanpainan agindu zuen Guantanamoko kartzela itxiko zuela.

Bi urte barru bere Gobernuaren arrakasta neurtzeko balioko du itxierak, «Time»eko elkarrizketan adierazi zuenez. «Presondegia modu arduratsu batean ixten badugu, tortura betirako erauzten badugu eta gure segurtasunaren eta gure Konstituzioaren arteko oreka lehengoratzen badugu», arrakasta hori neurtzea posible izango dela adierazi zuen Obamak.

Ildo beretik, alderdi demokratako buruak iragarria du Estatu Batuetako Armada Iraketik aterako duela, eta Afganistanen euren posizioa «sendotu» nahi duela gaineratu du, «ez bakarrik arlo militarrean, baita diplomazia eta ekonomia arloetan ere».

Obama «urteko pertsonaia» izendatu duen aldizkarian, Estatu Batuetako presidente hautatuak adierazi zuen beste helburu bat beteko litzatekeela «klima aldaketa bezalako arrisku transnazionalei aurre egiteko nazioarteko instituzioak berpizteko gai izanez gero». Horrez gain, «guk bakarrik ezin dugu konpondu», esan zuen Obamak.

Urtarrilaren 20an George W. Bush errepublikanoaren lekukoa hartuko duen presidente berriak egungo presidenteordea den Dick Cheney Guantanamoko presondegia ixtearen aurka eta torturaren alde agertu eta bi egunetara egin zuen bere iragarpena.

Dena den, Guantanamoko kartzelako itxiera ez dela zeregin erraza adierazi dute aurka agertu direnek. Lehenengo han dauden 250 presoekin zer egin erabaki beharko da.