Ameriketako Estatu Batuek Afganistanetik «irteteko» estrategia bat behar dutela plazaratu zuen Barack Obama presidente estatubatuarrak CBS telebista katearen «60 minutes» saioan eginiko elkarrizketan

Goi kargu beteranoek eta herrialde aliatuek emandako gomendioak oinarri hartuta, orain arteko estrategia berrikusten ari direla adierazi zuen. Gobernuaren asmoa George W. Bush presidente ohiaren politikatik aldentzea da. Hala, Afganistaneko garapen ekonomikoari arreta gehiago jarriko dio. Horretarako, ehunka funtzionario bidaliko ditu -diplomazialariak nahiz Justizia eta Nekazaritza sailetako lankideak barne-. Pakistan eta AEBen arteko harreman diplomatikoei ere lehentasuna emango die Washingtonek. Izan ere, azkenaldian, AEBetako Armadaren aire erasoek Pakistaneko muga izan dute helburu. Talibanak han ezkutatzen diren susmoa du Washingtonek. Eraso horiek direla-eta, Islamabadekiko harremanak okertu dira.

Horrez gain, herrialde aliatuekin koordinazio lanak sendotu nahi dituela azaldu zuen Obamak elkarrizketan.

Bestalde, gatazkaren gaineko hausnarketa egitean ikusmolde desberdinak lantzea ezinbestekoa dela helarazi zuen. Haren hitzetan, «ezin dugu pentsatu soilik ikuspegi militarra nahikoa izango denik gure arazoak konpontzeko», adierazi zuen.

«Beraz, elkarren arteko hartu-emana sustatzeko estrategia bilatzen ari gara. Eta estrategia horren barruan, Afganistanetik irteteko plan bat behar dugu. Behin betiko kontzeptua alboratu behar dugu. Ziur egon behar dugu hau ez dela betiko izango», nabarmendu zuen.

Bertan dauden militarrek Afganistan Irak baino «zailagoa» izango zela ohartarazi zutela gogora ekarri zuen Obamak hango egoera justifikatu nahian. Aitortu zuen ez direla irabazten ari. Talibanak gero eta indartsuago daude, eta, horiei garaitzeko uda aurretik 17.000 soldadu gehiago bidaliko dituela iragarri zuen pasa den hilean, inguru horretan egun dauden 36.000 soldadu estatubatuarrekin batuko direnak.

«Afganistan eta Pakistanen arteko muga erronka militar handia da. Hortzikatzeko hezur zaila izango da. Baina, ezin gara geldirik gelditu, eta terroristek babesa aurkitzea onartu», aditzera eman zuen.

Apirilaren 3 eta 4an NATOko buruzagiekin bilduko da Estrasburgon eta Khelen. Bilkura horien gai nagusia Afganistaneko egoera izango da.

Karzairekin «haserre»

Bestalde, «The Guardian»ek argitaratu zuenez, AEBek eta haren aliatuak «lehen ministro afganiar» bat izendatu nahi dute Hamid Karzai presidentearekin ez baitaude ados, eta haren boterea murrizteko. Ustelkeria eta gaitasunik eza leporatzen diote Karzairen gobernuari.

Aukera desberdinak aztertu dituzten arren, atzera bota dituzte «ez baitago ziurtasunik ondorengoa ez ote den hamar aldiz okerragoa izango», aipatu zuen iturri diplomatiko batek.