Israelgo lehen ministro berria izango den Benjamin Netanyahuk eta Israel Beitenu eskuin muturreko alderdiko buru Avigdor Liebermanek Zisjordaniako kolonia sionista bat zabaltzeko ezkutuko hitzarmena sinatu dute, atzo Armadaren irratiak jakitera eman zuenez.

Irrati horretan esandakoren arabera, ahozko akordio bat izan da, Washingtonen haserrerik ez eragiteko asmoz. Horregatik, kolonia hori zabaltzearen aipamenik ez da egiten Likud eta Israel Beitenuk Gobernu berria osatzeko sinatu duten akordioan.

Informazio horrek dioenez, 3.000 etxebizitza, bulego eta hotelak eraikiko dituzte Maale Adumim koloniaren alboan. eta hala, kolonia hori eta 1967an okupaturiko Ekialdeko Jerusalem lotzea du helburu Israelgo Gobernu berriak.

Palestinarrek gogor salatu dute egitasmoa, Zisjordania bi zatitan banatuko lukeelako. Hori gauzatuz gero, inoizko Estatu palestinarrak ez luke lurraldea jarraitutasunez antolatzeko modurik izango Zisjordanian.

Ez Likudek ez Israel Beitenuk ez zuten gain honen gaineko adierazpenik egin nahi izan. Maale Adumimeko alkate Benny Kashrielek, ordea, Liebermanek «etxebizitza horiek eraikitzeko beharrezkoak diren berme guztiak» eman zizkiola nabarmendu zuen.

2005ean Israelgo lehen ministro Ehud Olmertek koloniak handitzeko proiektu guztiak gelditzea adostu zuen AEBekin. Halere, ordutik hona ere aurrera eraman du Israelek koloniak indartzearen politika.

Aurrerantzean ere horrela segitzeko asmoa duela dirudi. Laboristen sostengua lortu ondoren, Netanyahuk Batasun Nazionala eskuin muturreko alderdiaren babes bila dabil.

Alderdi hori Zisjordaniako kolonoen jarreraren defendatzaile sutsua da.