LABeko Nazio Batzordea haserre agertu zen prentsaren aurrean, sarekada euren egoitzan burutu izanak eta LABeko idazkari nagusi ohi Rafa Diez Usabiaga eta Txelui Moreno kidea atxilo hartu izanak erasoa sindikatuaren kontrakoa ere bilakatzen duelako, Alfredo Perez Rubalcaba Barne ministro espainolak bestela dioen arren. Gainera, polizia operazio honen helburua, «independentziaren bidean urratsak ahabilderatuko dituen estrategiaren kontra» egitea dela sostengatu zuen. Hein horretan, «aitortzan eta errespetuan oinarri duen ziklo politikoa» defendatzen duen orori eragiten dio kaltea Garzon epaileak agindutako operazioak, eta beraz, horiei guztiei dei egin zien LABek atxiloketak direla-eta euren mespretxua adierazi eta kalera ateratzeko.

Atxiloketek herritarrengan eragindako amorrua berehala azaleratu, eta Euskal Herrian barna makina bat mobilizazio izan ziren atzo iluntzean. Gaur eguerdian izango da protestarako beste aukera bat, izan ere, sindikatu abertzaleak Hego Euskal Herriko hiriburuetan dituen egoitzen atarian elkarretaratzeetara deitu du. Bihar ere mobilizazio andana izango dira Euskal Herriko eskualde eta lantokietan, Ainhoa Etxaide LABeko idazkari nagusiak aurreratu bezala. Aitzitik, ez dira egunotan bukatuko protestak eta Etxaidek iragarri zuenaren arabera, atxiloketak salatu eta «benetako aldaketa» aldarrikatuko duen mobilizazio «handiago, sendoago eta bateratuagoa» egiteko lanean dira jada LABeko kideak.

Egoera betikotu

Sindikatuko zuzendaritzak, goizean goiz bilduta, «Erasoen gainetik Euskal Herrian aldaketa» izeneko adierazpena adostu zuen, eta gero, arratsaldeko prentsaurrekoan aurkeztu zuen. Agirian, sarekada salatzearekin batera, atxilotu guztiak askatzeko exijitzen dute Nazio Batzordeko kideek, eta euren kezka eta elkartasuna agertzen dute.

Etxaidek hartu zuen hitza, komunikabidez beterik zegoen aretoan, bezperan polizia espainolek okupatutako egoitzan. Euskal Herriak bizi duen errealitatea beste behin ere «errepresioaren bidez betikotu» nahi dutela salatu zuen.

Une honetan jokoan dagoena «Euskal Herriaren aitortza eta errespetuaren ziklo politiko berria irekitzeko urrats sendo eta definitiboak ematea» dela adierazi zuen Etxaidek. LABen iritziz ziklo hori irekitzeko bidea eskaintza politiko, akordio politiko eta apustu politiko argiak egiteak ekarriko duela azalduz, Euskal Herrian eta euskal eragileen artean egin beharreko ariketa dela zehaztu zuen, eta hori dela, hain zuzen ere, era honetako operazioekin zapuztu nahi dutena. Zehazki, «bide horretan ezker abertzaleak egin ditzakeen eta egingo dituen eskaintza politikoak indargabetzea da helburu», Etxaideren ahotan.

Ahulezia politikoa

Euskal Herriak «mugarik, injerentziarik eta biolentziarik gabe» aldaketa politikoa gauzatzeko aukera behar duela aldarrikatu zuen, eta horixe da, LABen aburuz, euskal eragile politiko eta sozialek gaur-gaurkoz eraiki behar duten jokalekua.

Sindikatu abertzalea ez da izan azken polizia operazio hau dela-eta haserre agertu den eragile bakarra, amnistiaren aldeko mugimenduak ere gogor gaitzetsi baitu hamar euskal herritarren atxilotzea. Gisa honetako operazioekin polizialki eta errepresiboki «ausarta» den Gobernuak agerian uzten du politikoki duen «ahulezia», komunikabideetara igorritako oharrean diotenari helduz. Atxilotuei babesa helarazi, eta herritarrei kalera ateratzeko deia egin zien, era berean.

Esan eta egin. Ehunka izan ziren iluntzean herrietan egindako manifestazioetan bildutako lagunak. Oiartzunen 200 herritar batu ziren, bizilagun duten Rufi Etxeberria eta gainerako atxilotuak askatzeko eskatuz. Beste horrenbeste bildu ziren Algortan; Errenterian, 300; eta 150 lagunek egin zuten manifestazioa Donostiako Altza auzoan. Irun, Elgoibar eta Urnietan, berriz, ehun bat herritar batu ziren manifestazioan. Urduñan eta Bakion 47; 89 Zornotzan; 55 Elorrion; 60 Leioa eta Erandion; eta 50 Zumaian, Lazkaon, Leitzan, Elorrion, Erromon eta Otxandion. Orion eta Ataunen, aldiz, 35 bildu ziren protestan; 20 Garesen eta 10 Anoetan. Goizean, 50 ikasle azpeitiarrek elkarretaratzea egin zuten Ikasberri ikastolan.