Gipuzkoako Mugikortasun eta Lurralde Antolaketa diputatu eta Hondarribiko aireportua sustatzen duen Ortzibia elkarteko lehendakari Arantza Tapiak atzo hedabideei adierazi zienez, bada «aukerarik» hegazkin konpainia berriren batek Hondarribiko aireportuan lan egin dezan, trukean «ordain ekonomikorik» eskaini gabe.

Hala eta guztiz ere, kontu «zaila» dela esan zuen, eta horregatik, Hondarribitik gertu dauden beste aireportu batzuetara zuzenduriko garraio zerbitzuak hobetzearen alde azaldu zen, eta horiekin «sarean lan egitearen» alde.

Andoain, Urnieta eta Hernani herriak Gipuzkoako hiriburuko ospitale-eremuarekin lotzen dituen Lurraldebus G-3 linearen handitzea iragartzeko komunikabideen aurrean egindako adierazpenetan Ortzibia elkartea hiru aire-konpainiarekin «oso serio» lanean ari dela eman zuen jakitera Tapiak, Hondarribiko aireportuak gaur egun duen eskaintza hobetzeko helburuarekin.

«Ez da erraza»

«Lanean tinko jarraitzen dugu eta espero dut hilabete honetan berri positiboren bat jasotzeko aukerarik izango dugula», azaldu zuen, «baina krisi garaian gaude eta ez da gauza erraza», onartu zuen Gipuzkoako diputatuak.

Tapiaren arabera, kontu zaila da, beraz, Hondarribiko aireportuan konpainia berriek euren zerbitzua eskain dezaten lortzea, izan ere, Ortzibiako lehendakariak nabarmendu zuenez, konpainiek «kontrapartida ekonomikoa» eskatzen dute Hondarribira lanera etortzearen truke.

Alderdi politiko guztiak

Hegazkin konpainiek egiten duten eskaerak, ordea, ez du alderdi politikoen babesik. Izan ere, Gipuzkoako Batzar Nagusietan eta Aldundian ordezkaritza duten alderdi politiko guztiak, «salbuespenik gabe», airelinea bakar bati ere diru laguntza ematearen aurka agertu dira.

Hala, Ortzibiako lehendakariak baieztatu zuenez, elkarte sustatzaileak Gipuzkoako aireportuaren eskaintza zabaltzeko lanean jarraitzen du, «baina hori da, hain zuzen, dagoen muga», esan zuen.

Zentzu honetan, «oso erraza da krisi garaian denei laguntzak eman behar zaizkiela esatea», adierazi zuen, baina «gure lehentasunak, hain zuzen ere, ez daude eremu horretan», gaineratu zuen.

Sarean lan egin

Hala, Tapiaren iritziz, gaur egungo egoera ekonomikoan, «akaso», Hondarribitik gertu dauden beste aireportu batzuetarako garraio zerbitzu publikoak hobetzeko lan egin behar da. Alde horretatik, gogora ekarri zuen jada martxan dagoen autobus linea bat, Donostia Bizkaiko Loiu aireportuarekin lotzen duena hain zuzen ere. Era berean, eta gertuko aireportuen arteko komunikazioa hobetzeari dagokionez, halako garraio lineak martxan jartzerakoan, «Biarritzeko aireportuarekin ere egin behar da», adierazi zuen.

Azkenik, «sarean lan egin behar da eta apustu egin, noski, herritarrak aireportuetara ahalik eta hobekien eta modu errazenean irits daitezen», azpimarratu zuen Mugikortasun eta Lurralde Antolaketa diputatuak. Hala, «agian neurri egokia ez litzateke beste konpainia batzuek Hondarribian lan egin dezaten laguntzea», adierazi zuen.