Talde onenen edo indartsuenen pare egon nahi du Osasunak, astean, gutxienez, bi neurketa jokatuz. Hala erakusten ari da, behintzat, Jose Antonio Camachoren taldea orain arte. Izan ere, asteburuan Ligako partida jokatzeaz gain, astean zehar Kopako kanporaketan murgilduta daude iruindarrak.

Honekin zazpi egunetan bi neurketa jokatu beharra duten hirugarren astea jarraian dute gorritxoek. Oraingoan, aurkariak Racing -ostegunean, Kopan- eta Xerez -igandean, Ligan- izango dira.

Baliteke andaluziarren aurkako neurketaz hitz egiteko goiz izatea. Baina, estatistikei begirada azkar bat emanda, aipatzekoa da orain dela gutxi arte Jose Angel Zigandak -Osasunako entrenatzaile ohia- entrenatutako taldea sailkapeneko azkena dela, zortzi punturekin.

Hala ere, jokalari eta entrenatzaile gehienek askotan aipatzen duten moduan, garrantzitsuena aurreneko dagoen neurketaz hitz egitea da, hori irabaztea baita lehen helburua.

Hala, aurreko larunbatean Espanyolen aurka lortutako garaipena alde batera utzi, eta denboraldi ona egiten ari den Racingen aurkako partida izan behar dute buruan jokalari nafarrek.

Final-laurdenetako kanporaketa orekatua espero du Kopan titularra den Roberto atezainak. «Oso garrantzitsua da gure atea hutsean mantentzea; baina gola sartzeak ere garrantzia bera du. Kanporaketa oso orekatuta dago; Ligako zenbakiek erakusten dute. 180 minutuko kanporaketa batek luzea ematen du, baina oso motza da eta xehetasun txikietan erabakiko da. Gola sartu eta emaitza ona ekarri behar da, Racing etxetik kanpo oso talde konplikatua baita», adierazi zuen atezainak.

Europara begira

Ligako sailkapenari begiratzen badiogu, Osasuna eta Racing hamabigarren eta hamahirugarren postuan dira, hurrenez hurren, biak 20 punturekin. Oreka hori apurtzen ahalegindu beharko dira nafarrak. Horretarako, futbolean askotan balio duen faktore bat alde izango dute Camachoren jokalariek, izan ere, joaneko partida Santanderren jokatuko dute, eta itzulerakoa, Sadarren.

Koparen bidez Europarako sailkapena lortzeko esperantza du Robertok. Izan ere, garrantzitsuena Liga da, baina «Kopa ilusioa da, gogo ikaragarria sortzen du. Final batera iristeko eta lehiaketa europar bat jokatzeko lau partidara gaude».

Espanyolen aurkako partidaz ere mintzatu zen. Haren ustez, «larunbatekoa egun berezia izan zen, sailkapena estutzen zihoalako eta irabazteak denboraldi amaierako puntuen batez bestekoan egoten laguntzen dizulako».

Canales, Racingen harribitxia

Igandean atsedena izan eta gero, talde gorritxoa atzo bueltatu zen entrenamenduetara aste gogorra prestatzen hasteko.

Larunbatean titular izan ziren jokalariak lasai aritu ziren korrika beste taldekideekin batera, baina berehala alde egin zuten.

Hala, Camacho Kopan joka lezaketen jokalariekin aritu zen eraso-defentsa ariketak eta partida txiki bat egiten.

Nekounam eta Azpilicueta ez ziren taldekideekin entrenatu, arazo fisikoekin baitaude biak, eta gimnasioan aritu ziren. Gaur ezagutuko dute jarraitu beharko duten plana. Oier Sanjurjo ere gimnasioan aritu zen, bakarka.

Baina, osteguneko partidari dagokionez, Racingen bolada onaren arrazoi nagusienetako bat Sergio Canales jokalaria erakusten ari den maila handia da.

18 urteko erdilariak azken jardunaldietan erakutsitako joko ederra eta golak -azkena asteburu honetan Valladoliden aurka- Ligako eta Europako hainbat talde handiren ahotan egon da. Real Madrilek eskaintza serioa egin dio, antza, jokalariari, aurten Racingen utzita amai dezan denboraldia eta etorkizunean Madrileko taldean aritzeko.

Oraindik ezer ziurtatuta ez badago ere, argi dagoena da Osasunak arazoak izan ditzakeela Racingen harrobiak azken urteetan eman duen harribitxirik handiena gelditzeko.