Itxakok erabakita utz dezake eskubaloiko ABF Superliga, gaur arratsean Eldari irabazten baldin badio (20.30ean, Lizarrerria kiroldegian). Itxako aurreneko postuan dago 39 punturekin eta Elda bigarren da 35ekin. Gaur garaipena lortuz gero, bien arteko aldea sei puntukoa litzateke lehiaketa amaitzeko lau partidaren faltan eta jokoan zortzi puntu baino ez daudenean.

Hala ere, gaurko norgehiagokak garrantzia apur bat galdu du azken jardunaldiaren ondoren. Izan ere, Eldak 23 eta 24 galdu zuen etxean sekulako ezustekoa eman zuen Vicar Goya taldearen aurka. Modu horretan, lehen bi sailkatuen arteko aldea lau puntukoa da orain eta, gaur galduta ere, Itxakok lehen postuan jarraituko du.

Norabide horretan, Ambros Martin entrenatzaileak, partidaren atarikoan, emaitzaren garrantzia erlatibizatu nahi izan du: «Nahiz eta inguruko baldintzak oso bereziak izan, inoiz ez dituzte hiru puntu ematen garaipen baten truke. Hala ere, egia da, emaitza erabakigarria izan ez arren, neurketak final baten tankera hartu du».

Aurkariari dagokionez, kontuan hartu beharreko beste faktore bat ere bada. Itxakok ez bezala, EHF Kopan bizirik jarraitzen du Alacanteko taldeak. Finalerdietan buru-belarri sartuta dabil uneotan eta, joaneko partidan 27-23 irabazi ondoren, igande honetan jokatuko du Alemanian itzulerako partida Bayer Leverkusen taldearen aurka.

Badirudi bi lehiaketa ezberdinetan sartuta egoteak kalte egin diola Elda talde indartsu baina motzari. Edonola ere, Ambros Martinek argi du hori ez dela aitzakia izango aurkarientzat: «Ez dut uste Lizarrara indarrak gordetzera etorriko direnik. Guri antzeko zerbait gertatu zitzaigun iaz. Irabaztera irten ginen bai Eldan eta bai Alemanian, eta ongi irten zitzaigun. Elda talde handia da eta jokatzen duen kantxa guztietan irabazi nahiko du».