Egun berezia izan zuten atzo Realeko jokalariek, denboraldiko momentu honetan -igoera oso gertu dutela- bizitzen ari direnaren antzekoa. Izan ere, Donostiako Puio auzoan egindako futbol-zelai baten inaugurazioan parte hartu zuten zuri-urdinek.

Vasconia kirol elkarteko parrokoak bedeinkapen berezia egin eta gero, Realeko, Udaleko, Aldundiko eta klubeko ordezkariek zenbait opari elkar trukatu zituzten. Jarraian, haurrek aurreskua dantzatu eta Martin Lasarte entrenatzaileak bere gizonak lanean ipini zituen, bertan gerturatu ziren adin guztietako jarraitzaileen gozamenerako.

Villarreali irabazi ziotenetik, asko ari da komentatzen Realak larunbatean bertan lor dezakeela matematikoki Lehen Mailarako txartela.

Izan ere, behin Cadizen aurka garaipena lortuta, baliteke Realak hegazkinean bertan ospatu ahal izatea Lehen Mailarako igoera, baina horretarako Betisek bere partida galdu beharko luke etxean, Numantziaren aurka.

«Berri ona hegazkinean ez jakitea espero dugu, lurrera eror baitaiteke, eta orduan ezin izango genuke ospatu», txantxetan aritu zen Diego Rivas.

Hala ere, taldean denek dakite lehendabizi Cadizen aurka irabazi behar dela. Eta Rivasek berak oso ondo ezagutzen du talde andaluziarra, bertan aritu baitzen 2007-08 denboraldian Realak utzita. Ez du, ordea, oso zapore gozoa, urte hartan Bigarren B Mailara jaitsi baitzen Cadiz. «Oroitzapen onak ditut, baina hain atseginak ez diren oroitzapenak ere bai. Cadizen ibili nintzen urtean jasan genuen kolpea zaila da ahazten. Lagunak ditut oraindik bertan», adierazi zuen Rivasek.

Hala ere, jarraitu zuenez, «zoritxarrez, 90 minutuetan zehar gure helburuek talka egingo dute, eta bakoitzak partida irabazi nahiko du. Espero dugu biok gure helburua lortzea denboraldi amaieran».

«Ileak tente» Cadizen

Eta hala da. Realak igoera du jokoan, eta Cadizek Bigarren Mailan mantentzea. Hala ere, gipuzkoarrek ez dute Ramon de Carranza futbol-zelaian inoiz irabazi. Hamahiru neurketa jokatu dituzte bertan, zazpi berdinketa eta sei porroteko balantzea izanda.

Rivasen ustez, «partida polita izango da jokatzeko. Cadizeko jarraitzaileek euren taldea hegaka eramaten ahaleginduko dira; eta bertara joaten diren Realeko zaleak ere gauza bera egiten ahaleginduko dira gurekin. Espero dugu zaleen maila berean egotea. Zelaira salto egiterakoan ileak tente jarriko zaizkigu». Are gehiago, Betisen aurkako partidan zegoen giro bikaina Cadizen egon daitekeenarekin alderatuta, honakoa aipatu zuen: «Egon naizen futbol-zelaietatik, Cadizeko zaleak, onenak ez badira, onenen artean daude».

Eñaut Zubikaraik, bestalde, lehenbailehen lortu nahi du igoera: «Gauzak lehenengo astean egin badaitezke, egin eta listo, lehiaketak ez baitu barkatzen gero. Ahal den arinen gauzak egin eta amaiera eman».