Caroline Phillipsek forma eman zion, badira bost urte, Radiokultura.com-eko lehen interface-ari, eta urtemugaren atarian ere berari egokitu zaio Internet bidezko irratiaren aurpegi berria marraztea. Bere ustez, 2005. urtean Errobi Promotions elkarteak abian jarri zuen egitasmoa «guztiz aitzindaria zen, eta, bost urteren bueltan, aise erran dezakegu Arte Radio irratiarekin batera Radiokultura bakarra dela Europan horrelako eskaintza eginez».

Kalitatea eta aniztasuna, horiek dira Radiokulturak erein dituen haziak, «tresna moderno baten bidez, gure lurraldea eta biztanleak hobeki ezagutarazteko», Mikel Etxebarria proiektuaren animatzaileak azaldu duenez.

Urte hauetan proposamenak etengabe berritzen joan dira. Hartara 2006az geroztik Euskal Irratiekin elkarlanean euskarazko kurtsoak eskaintzen ditu. Aldaketa handia nabarituko dute erabiltzaileek, buruiletik aitzin, ikasgaiak deskargatzeko parada eskainia baita.

Euskararen Erakunde Publikoaren (EEP) sostenguz abiatu duen proiektu pedagogikoan, 6-11 urte arteko haurrengana hurbilduz, galdera zehatza pausatuko diete ehunka haurrei: «Zein da zuen ametsik handiena?». Azkaineko ikastolan eginiko lehen esperientziak «freskotasun handiko soinuak ekarri dizkigu», azaldu du Etxebarriak. Batek pilotaren izarra izatearekin amets egiten du, besteak aitatxi-amatxi hurbil bizitzea du amets, eta, bertze batek, miau!, gatua bilakatu nahi du... Internetek eremu zabala dela aski frogatu du Radiokulturak. Eta, jakina, amets egitea librea da.