Abenduaren lehena aukeratu zuten BideHuts plataformako kideek «Txinaurriak. Mikel Laboari ikasitako kantuak» izeneko disko bilduma aurkezteko. Data berariaz aukeratutakoa zen, Mikel Laboa hil zeneko bigarren urteurrena ospatzen den egun berean egin baitzen ekitaldia. Aurkezpena egiteko hautaturiko tokia ere berezia da. Doka kafe antzokia Antigua auzoaren bihotzean kokatua dago, Mikel Laboak urte askoan bizileku izan zuen auzoan, eta Gipuzkoako hiriburuko euskal kulturaren adierazle nagusietako bat da egun.

Mikel Laboa omenduko zuen disko bilduma bat egiteko asmoa aspaldikoa zela adierazi zuen Asier Zulueta BideHuts egitasmoko kideak. «Laboarekiko errekonozimendua eta mirespena handia izan da musikarien artean, eta BideHuts plataformatik gure apurra jarri nahi izan dugu. Horretarako, dakiguna egiten saiatu gara: disko bat». BideHuts zigiluaren arduradunen buruhauste nagusietako bat bilduman parte hartuko zuten taldeak aukeratzea izan da. «Oso zaila egin zaigu taldeak aukeratzea. Talde zerrenda ugari izan ditugu esku artean, eta azkenean 19 musika talde hauek izan dira aukeratuak». Lan hau egiteko orduan oso garrantzitsua izan da Laboaren sendiaren babesa eta bultzada: «Zalantzarik gabe, azken urratsa emateko ezinbestekoa izan da Mikelen sendiak eman digun konfiantza. Esker oneko hitzak besterik ez ditugu beraientzako».

Rock bilduma

«Txinaurriak» rock diskoa dela adierazi zuen Karlos Osinagak: «Rock hitza erabiliko nuke diskoko kantuak azaltzeko. Kantu batzuk klasikoagoak dira eta beste batzuk esperimentalagoak, baina guztiak sar daitezke `rock' hitzaren azpian». Zentzu horretan, aukeraturiko 19 euskal parte hartu duten taldeen artean sona handiko musikariak daude (Ruper Ordorika, Atom Rhumba, Anari, Berri Txarrak...), bai eta proposamen minoritario eta esperimentalagoak (Gora Japon, Akauzazte denok...) ere. Sortzaile berrientzako tokia ere izan da eta musikan bidea hasi duten zenbait proposamenei tartea egin diete disko bilduman (Gabon Caligula, Dilistak). Bitxikeria ugari gordetzen dituen lana da «Txinaurriak». Tartean, hainbat musikariren lankidetzatik sorturiko proposamen bereziak. Hor koka daitezke Miren Iza (Tulsa taldeko abeslaria) eta Hotel taldeen arteko elkarlana, edota Mursego eta Etenen arteko indar metaketa. Bertsioak egiteko aukeraturiko 19 kantuen artean ere aniztasuna da nagusi eta Mikel Laboaren kantutegi zabaleko txoko guztiak ukitzen dituzte. «Lili bat», «Haize hegoa» edota «Aintzinako bihotz» kantu ezagunetatik abiatuta, «Bedeinkatua» edota «Kirru» kantu kasik instrumentaleraino.

Biniloan

«Txinaurriak» bi formatutan merkaturatu du BideHuts plataformak. CD formatuan kartoizko digi-pack erako disko bikoitzean aurkeztua dator, batetik, eta binilo eran ere ikusi du argia bestetik, 180 gramoko binilo zuri bikoitzean. «BideHutsen binilozale amorratuak gara», adierazi zuen Karlos Osinagak, eta «poza ematen du formatu honetan ikusteak», jarraitu zuen segidan. Binilo erako lana eskuratzen duenak, 2 CDak ere eskuratuko ditu (azalik gabe). Diskoan azaltzen diren 19 kantuak 2010eko uztaila eta urria bitartean grabatuak izan dira. Horretarako, Tolosako Bonberenea estudioa izan dute gotorleku nagusia, nahiz eta kantu batzuk Azkoitiko Mataderon, Koba eta Garate estudioetan grabatutakoak diren.