Marka guztiak hausten ari da Stephane Hessel (Berlin, 1917) idazle eta diplomatiko oiha. Arrazoia, berrogei orri eskas dituen «Haserretu zaitezte!» (Indignez-vous!) idazlana da; hain zuzen ere, gazteak matxinatzera deitzen dituen testua. Hasieran frantsesez argitaratu bazen ere, hainbat hizkuntzatara itzulia izan da dagoeneko: italierara, gaztelerara edota alemanierara. Berriki, Denonartean-Cénlit argitaletxeak eus- karaz kaleratu du, Inma Erreak itzulita.

Hessel Estatu frantseseko erresistentziako kide izan zen eta naziek atxilotu, torturatu eta Buchenwaldeko zigor-esparrura eraman zuten. Handik bitan egin zuen ihes. Nazio Batuen Erakundeko funtzionarioa zela, 1948. urtean, Giza Eskubideen Adierazpen Unibertsalaren hamabi idazleetako bat izan zen.

Joan den abenduan, munduaren egoera kaskarra ikusita, «Haserretu zaiztezte!» idatzi eta kaleratu zuen. Haserretzeko arrazoi ugari badirela dio Hesselek eta honako deia egiten die gazteei: «Guk, Frantzia librearen alde borrokatu ziren indarretako eta erresistentzia mugimenduetako beteranook, belaunaldi gazteei egiten diegu deia, Erresistentziaren herentzia eta helburuak biziberritu eta heda ditzaten. Hau esaten diegu: hartu lekukoa, haserretu zaitezte!».

Idazlearen aburuz, erresistentziaren funtsezko arrazoia haserrea izan zen. Iragandako garaiak gogorrak izan zirela bai, baina gaur egungoak ere samurrak ez direla argudiatzen du. Txirotasuna edota Lurraren egoera jartzen ditu adibidetzat.

Milioia baino gehiago

Iragandako abenduan kaleratu zenetik, idazlanaren salmentek gora egin dute etengabean eta dagoeneko milioi bat ale baino gehiago saldu dira. Estatu fransesean, esaterako, ez fikzioko liburuen artean bigarren salduena da, baita Italian ere.