Festa bikainak igarotzeko ezinbesteko osagaiak dira konpainia eta giroa. Lehendabizikoa bakoitzaren hautua da, gustuaren arabera. Bigarrena lortzeko, berriz, umore ona eta dibertitu nahi izatea ezinbestekoak dira. Eta horretarako, parte hartzeko borondatea edukitzea da gakoa. Hain zuzen, hori lortzea izan da Oñatiko Udalaren helburuetako bat dagoeneko abian diren San Migel jaiei begira.

Datorren urriaren 3ra arte iraungo duten jaiak antolatzerako orduan, herritarren iritziak jaso nahi izan zituzten: iradokizunak, ideiak, iritziak... edozerk balio zuen denon artean egitaraua diseinatzeko, eta batez ere, ideia berriak proposatzeko. Esperientzia ona izan dela agerian gelditu da, Mikel Biain alkateak horri erreferentzia egin baitio oñatiarrei bidalitako agurrean. Eskerrak eman dizkie «aurtengo jaien antolaketan fin-fin ibili diren herritarrei eta udal langileei». Jai Batzordekoak eta Txosna Batzordekoak ere aritu dira ahal zuten horretan laguntzen.

Uztailean egindako batzarrera bueltatuz, bertan mahaiaren gainean bildu ziren ideien fruituetako bat da aurten bi jai eremu izatea. Hala, plaza inguruan burutuko diren ekintzez gain, goialdean, Atzekokalen ere izango da zertan dibertitu.

Bestalde, hamabost urte pasatxo dira Txosna Batzordeak bere jai egitaraua antolatzen duela Unibertsitateko plazan. Eta azken urteotan egitarau ofizialean sartzeko hasieran zeuden zailtasunak leundu badira ere, Bilduk gidatzen duen Udal Gobernuak elkarlana bultzatu egin du, betiere, bere herri programa -lehen aipatutako herritarren parte hartzea xede duena- berretsiaz.

«Bakoitzak bere erara»

Hau guztia kontuan hartuta, agenda begiratu eta bakoitzari zein ekintza interesatzen zaion hautatzea besterik ez da falta. Baina atzo ohartarazi genuen bezala, neurria ondo hartu beharra dago! Festak amaitu aurretik oraindik egun batzuk gelditzen dira, eta beraz, indarrak ondo administratu beharko dira eta.

Bihar Txantxi familiaren eguna da, haurrek, eta hortaz, gurasoek kontuan izateko eguna. 11.00etatik aurrera plazan tailerrak, jolasak, ludoteka eta lehiaketak izango dira. Diana jaurtiketarekin irekiko da plazako egitaraua. Ondoren, astotxo lasterketa -11.30-, oztopo lasterketa -12.00- eta porte jaurtiketa -12.30- izango dira.

Sukaldean zein trebeak diren ere erakutsi ahal izango dute 12.00etatik 13.00etara egingo den pintxo lehiaketan. Jarraian, horiek dastatzeko aukera izango da.

Txosnagunean, bitartean, Egun Morea ospatuko dute. Emakumearen eta berdintasunaren aldeko egunean, bazkari feminista egingo dute, 14.00etan. Txartelak bost euroren truke eskuratu daitezke Boga, Ona eta Arrano tabernetan.

16.00etan, eta eguneko gaiari jarraituz, Olinpiada Moreak egingo dira eta 18.30ean Transmarikabollo kalejira.

17.00etatik 19.30era ikusmira plazan jarriko dute oñatiarrek, sokamuturra izango baitute, Arno ganadutegiko zezenekin. Udalak dagoeneko ohartarazi du hamasei urtetik beherakoek guztiz debekatuta dutela ekintza honetan parte hartzea, eta aurreratu dute Udalak ez duela gertatzen denaren gaineko erantzukizunik bere gain hartuko. «Hesietan jarritako burladeroak [babeslekuak] korrikalarientzat bakarrik dira», erantsi dute.

Sexu erasoak salatzeko

Festetan gertatzen diren sexu erasoak direla eta, herri eta hirietan kanpaina bereziak egiten dituzte, gizartea arazoaz konturatzeko eta halako erasoak behingoz desagertzeko, azken urteetan batez ere. Hain zuzen, Oñatiko Berdintasun Batzordeak sanmigeletan jazo daitezkeen sexu erasoen salaketak egiteko telefono zenbaki bat jarri du: 688 67 94 62.

Jakinarazi dutenez, hogeita lau orduz martxan egongo da eta horren bidez laguntza psikologikoa eta juridikoa eskainiko dute. Halaber, gaur, bihar eta larunbatean Txaketua inguruan kanpainaren gaineko informazio zabalagoa eskainiko dute.

Gune horretan gaian adituak diren profesionalak arituko dira, indarkeria jasaten duten pertsonak artatzen esperientzia dutenak, hain zuzen. Edozein galdera edo kontsulta erantzuteko prest izango dira.

Kanpaina indartzeko asmoz, jai parekideen aldeko pegatinak egin ditu Udalak. «Ez isildu. Ez izan indarkeriaren konplize», dio pegatinako mezuak. Egunotan banatzeaz gain, hainbat puntutan ipiniko dituzte.