Uda giro honekin horrelakorik pentsatzea zail egiten zaigun arren, hasi da abendu hasieran ospatuko den Durangoko Euskal Liburu eta Disko Azokarako atzera kontaketa eta 46. edizio hau iragarriko duen kartela eta kultur gonbidatua atzo eman zituen ezagutzera Gerediaga elkarteak.

Izan ere, urtero gonbidatu berezi bat izaten du Azokak eta aurtengoa kultura galegoa izango dela azaldu zuen atzo Jon Irazabal zuzendariak. «Culturgal elkartearekin elkarlanean, sortzaile euskaldunek eta galegoek elkarrekin parte hartuko duten ekimenak sustatuko dira», azaldu zuen. «Ez dugu ekintza puntual edo anekdotikoak izatea nahi. Zubi lana egiten eta sinergia horiek aprobetxatzen saiatuko gara, euskaldunen eta galegoen arteko harremanak sendotzeko».

Culturgal elkarteak Galiziako kultur industriari eskainitako azoka antolatzen du urtero eta aurten abenduaren 2tik 4ra egingo dute Pontevedran. Hango azken egunak Durangoko lehenengoarekin bat egingo du, beraz.

Biniloa oinarri

Abenduaren 4tik 8ra Landako Gunean izango den euskal kulturaren urteroko hitzordu garrantzitsu honen irudia izateko, bestalde, guztira 28 lan aurkeztu dira aurten eta, horien artean, Cristobal Aguilo Dominguez, Murtzian bizi den valentziarraren irudia izan da aukeratu dutena. Atzo azaldu zuenez, azoka honen funtsezko ezaugarri diren bi elementu nagusiak uztartzen saiatu da; liburua eta diskoa. Horretarako, binilozko diskoa hartu du oinarri eta beltz eta gris koloreak erabili ditu.

«Interneten diskoen bila hasi nintzenean, ebakitako edo muxarratutako disko hauekin egin nuen topo eta hor ikusi nuen liburua sartzeko aukera», azaldu zuen Aguilo diseinatzaileak. Irudian, pertsona bat ageri da, liburu bat eskutan duela.

Lehiaketara aurkeztu diren gainerako kartelak www.durangokoazoka.com atarian daude ikusgai, bestelako gainerako informazioez gain.