Ibon Iparragirrek ia astebete darama Basurtoko ospitalean, biriketako infekzio batek bere osasun egoera larriagotuz geroztik, duela hogei urtetik GIBduna da-eta. Animo aldetik pixka bat hobera egin arren, makal jarraitzen duela ohartarazi eta le- henbailehen askatzeko beharra berretsi dute senideek.

«Ibonek ezin du minutu bat gehiago ere egoera horretan jarraitu», adierazi zion GARAri haren neska-lagunak. «Ospitalera eraman zutenean, espetxera berriro itzul zezatela eskatu zidan. Gelan ohe huts bat besterik ez dago. Ez du beste inor alboan, ezta telebistarik edo telefonorik ere. Bueno, ostiralean irrati txiki bat sartzen utzi ziguten. Komuna kanpoan du, eta komunera joan nahi duen bakoitzean, txirrina jo eta ertzainek lagunduta joan behar du. Espetxean, behintzat, telefono deiak zituen eta patiora atera zitekeen. Hasierako egunetan nahastuta egon zen, psikologikoki oso gogorra izan zen berarentzat, na- hiz eta osasun aldetik hobeto zainduta egon», azaldu zuen.

Iparragirre lehenbailehen askatzea premiazkoa dela nabarmendu zuen. Orain arte egin diren mobilizazioak eta jasotako elkartasuna eskertu zituen. Atzo, manifestazio jendetsua egin zuten bere herrian, Ondarroan. «Oso pozgarria da jendearen berotasuna jasotzea. Gizartea egoeraren gainean dagoela ikusteak nolabaiteko itxaropena ematen digu», plazaratu zuen.

«Askatzen dutenean egingo dugun lehenengo gauza ospitaleko logela arrunt batera eramatea izango da, bertan familiaren berotasuna mugarik gabe jaso dezan. Horrek aurrera egiten lagunduko dio dudarik gabe», adierazi zuen neska-lagunak.

Gaur joango da Basurtoko medikuekin hitz egitera asteburuan nola egon den jakiteko.

Gainera, gaurkoan ere Donostian egitekoa den Gatazkaren Konpontzea Sustatzeko Nazioarteko Konferentzian izango da Iparragirreren aldeko plataforma, partehartzaile guztiei gaixorik dauden euskal preso politikoen egoeraren berri emateko asmoz.