Biarritzek Heineken Kopan aurrera egin nahi baldin badu, garaipena behar du bihar Saracensen zelaian. Galtzen badute, akabo lapurtarren aukerak, eta burua Ligan bakarrik izan beharko dute. Norgehiagoka 16.00etan hasiko da.

Biarritz denboraldiko unerik onenean da. Azken bi jardunaldietan garaipena lortu du, eta mailari eusteko itxaropena indartzen ari da. Kasualitatea edo ez, Yachviliren unerik onenarekin batera iritsi da zuri-gorrien susperraldia. Dimitri ezinbestekoa izan da azkeneko denboraldi hauetan Agileran, eta aurten ere horrela izango dela dirudi.

Munduko Kopan izan zen bitartean bere hutsunea oso nabarmena izan zen, eta handik ez zen sasoiko itzuli; bere falta izugarri nabaritu dute bere taldekideek. Orain, ordea, badirudi indartsu dagoela. Ostikoekin dena barrura sartzen du, eta jokoa ederki antolatzen du. Bihar ere bere jokoaren arabera arituko da ziurrenik taldea. Ongi baldin badago, zuri-gorriek, seguruenik, partida ona egingo dute; bestela, komeriak izango dituzte.

Une honetan, Saracens sailkapeneko lehen postuan dago 14 punturekin, eta bigarren Biarritz, bi puntu gutxiagorekin. Beraz, bihar Laguisquetek zuzentzen dituen mutilek garaipena erdietsiko balute, lehenengo jarriko lirateke, eta final laurdenetan izateko sekulako urratsa emango lukete, nahiz eta azkeneko jardunaldian ere irabazi egin beharko luketen, besteei begira egon beharrik ez izateko.

Orain dela hiru aste guztiz beltza zena, orain argitu egin da, taldearen jokoak horretarako itxaropena ematen baitu, baina Serge Blancok, taldeko nagusiak, garbi utzi du hankak lurrean izan eta gauzak lasai hartu behar direla. Klubak, ordea, jokalari oso onak ditu, eta beren maila ematen hasten direnean, gora egin beharra dauka.

Orain arte jokatu diren lau jardunaldietan, Saracensek hiru irabazi ditu eta bakarra galdu du. Biarritzek, aldiz, bi partida irabazi eta bi galdu ditu, eta final laurdenak jokatzeko, bai behintzat inori begira egon gabe, geratzen diren bi partidak irabaztea komeni zaio. Azkeneko urte hauetan, lapurtarrak beti sailkatu dira bigarren fasera, eta orain bi urte, gainera, finala ere jokatu zuten; kolpe handia izango litzateke Agilerakoentzat aurten aurrera ez egitea.

Taldeak erabakita

Bi taldeetako entrenatzaileek hamabostekoak erabakita dituzte, eta honako hau izango da Biarritzek zelairatuko duena: Barcella, Terrain, Gomez Kodela, Thion, Taele, Lauret, Guyot, Fauere, Yachvili, Bosch, Bolakoro, Traille, Gimenez, Ngwenya eta Balshaw. Aulkian, berriz, Heguy, Marconet, Guinazu, Carizza, Harinordoki, Peyrelongue, Baby eta Haylet Petty geratuko dira entrenatzaileekin batera.

Saracensen hamabostekoa hau izango da: Gill, Smith, Borthwick, Botha, Brown, Saull, Joubert, Spencer, Hodgson, Wyles, Barritt, Farrell, Strettle eta Goode. Aulkian, berriz, George, Du Plessis, Stevens, Kruis, Wray, Stringer, Powell eta Short geratuko dira, partidan zehar minuturen batzuk jokatzeko itxaropen osoarekin.