Kirurgialari pribatuen grebak ospitalean eragingo du
·Klinika pribatuetan lan- uzteak ari dira egiten tarifen eguneratzea eta aseguru-sari apalagoak eskatzeko
BAIONA
Orain bi urte Gizarte Segurantzarekin beren tarifak eguneratzeko sinatutako akordioa bete ez delako eta, bestetik, beren jarduera profesionalaren ondorioz sor daitezkeen ardura zibilak estaltzeko ordaintzen dituzten aseguru-sariak gero eta garestiagoak direlako, esparru pribatuko kirurgialari, anestesista eta ginekologoen sindikatuek grebarako deia egin dute Estatu osoan.Ipar Euskal Herriko hainbat kliniketan grebak ez du, oraingoz, eragin handirik izan, baina mugimendua pixkanaka zabaltzen ari da. Horrela, Baionako Saint Etienne klinikan, Donapaleukoan eta Donibane Lohizuneko Poliklinikan ere, kirurgialariek hil edo biziko larrialdiak besterik ez dituzte artatzen, eta hori, prefetak gutxieneko zerbitzuak bermatzea agindu dietelako. Horiek horrela, gainerako zaintza egintzak Baionako ospitalera desbideratzen ari dira, Donapaleukoak salbu, inguruetan ez baitago arreta espezializatuko beste zaintza gunerik. Kirurgialari sindikatuen asmoa ospitale publikoko zerbitzuak gainezka jartzea da, botere publikoak beren eskakizunak behingoz kontuan har ditzaten presioa areagotzeko. Mementoz, Baionako ospitalean ez dago arazo aipagarririk.
|
