TOLOSA
Atzoko finalean Miel Mindegiak desafioa bota zuen. Ezkurrako aizkolari beteranoa berrio ere apusturako prest dagoela iragarri zuen.
Nazabal eta Larretxea kenduta, edozeinen aurka hogei kana-erdikotara jokatzeko prest dago. Beraz, bi horien ez gainerako guztien aurka jokatuko luke hogei kana-erdikotara, eta 12.000 euro bitarte dirutan jokatzeko prest legoke. Apustua abenduaren erdia baino lehen jokatu beharko litzateke.
Berarekin hitz egin nahi duenak datorren ostiralean Tolosan aurkituko du Kantabriko tabernan, iluntzean, 20.00etatik aurrera.
Apustu hori badirudi Olasagastiri zuzendutakoa dela, nahiz eta izenik ez zuen aipatu nahi izan. Halere, Igeldokoak garbi esan zuen atzoko finalaren ostean ez daukala apusturako asmorik: «Ni ez nago orain apustuak jokatzeko. Denboraldia oso luzea izan da. Udan erakustaldi asko egin ditut, eta ez daukat apustuarako asmorik». Erantzuna ostiral gauean jakingo da.
