Baztarrikak «urduritasuna» egotzi dio Kontseiluari ziurtagirien aferaren harira
Lan-Hitz programaren barruan eman na- hi dituen ziurtagirien bidez, Lakuak berriro ere Kontseilua aspalditik egiten ari den lana «bikoiztu nahi» duela salatu zuten herenegun euskararen aldeko eragileek. Polemikari heldu dio Lakuak: Hizkuntza Politikarako Sailburuordetzak ukatu egin du hori horrela denik eta orokorrean «deigarri eta tamalgarritzat» jo du bere ekimenen aurrean Kontseiluak azaldu duen «kritika eta urduritasuna». Elkarlanerako prest direla esan du.
GASTEIZ
Duela hilabete batzuk Behatokiaren Euskararen Telefonoaren antzeko ekimena abiatu zuen Lakuak: Elebide zerbitzua. Orain, euskararen erabilera ebaluatzeko ziurtagiriak ezarriko dituela iragarri du, antza, Kontseiluko Bai Euskarari ziurtagirien ideiari jarraituz. Polemika sortu da, ondorioz, bi erakundeen artean. Kontseiluak kezka agertu zuen astelehe- nean, eta horri erantzuna eman dio Patxi Baztarrika buru duen Hizkuntza Politikarako Sailburuordetzak.
Ziurtatu duenez, bere jarduna «ez doa ez inoren ez ezeren aurka, euskararen alde baizik». Ildo horretatik, Lakuak 1991n «lan munduan euskara sustatzeko esperientzia pilotuak» abian jarri zituela ekarri du gogora, bai eta «enpresa guztientzako euskara planetarako diru-laguntzak banatzen hamar urte» daramatzala ere.
Oraingo ekimenari dagokionez, legealdi hasieran publikoki iragarri zuena baino ez dela betetzen ari esan du Hizkuntza Politikarako Sailburuordetzak. Eta honakoa erantsi du: «Ziurtagiri honek ezaugarri propioak ditu eta ez du Bai Euskarari ziurtagiriaren antzik. Ez dago, beraz, Eusko Jaurlaritzaren aldetik inolako bikoizketarik».
Hala ere, auzi honetaz harago bi erakundeen arteko harremanaz hitz egiten du Lakuak prentsa adierazpen horretan. Horrela, nabarmendu du «deigarria eta tamalgarria» dela «Jaurlaritzak euskararen aldeko neurri bat hartzen duen bakoitzean batzuek, poztu ordez, kritika eta urduritasuna azaltzea».
«Egiten ez dugunean egiten ez dugulako, eta egiten dugu- nean egiten dugulako, baina batzuentzat ezinezkoa dirudi herri-erakundeek euskararen arloan ezer bikain egitea», erantzun dio Lakuak Kontseiluari.
Horrekin batera, «elkarlan zintzoa eta jatorra» lortu nahi bada, gaineratu du «mahai baten inguruan» gertatu behar dela, ez hedabideen bitartez». Eta Kontseiluarekin biltzeko prest dela gaineratu du.
|
