«Pazientzia bertute iraultzailea ere bada»

Belaunaldi bereko beste gazte asko bezala, herriak kezkatzen zuen. Konpromisoak ETAn sartzera bultzatu zuen. 22 urte zituela, atxilotua, torturatua eta espetxeratua. «Galtzeko gutxi eta irabazteko asko» zuela, Granadako kartzelatik ihes egiten saiatu zen. Huts egin zuen, baina ez zuen etsi. Ia 31 urte eman ditu kartzelan. Europan espetxean denbora gehien pasa duen preso politikoa da. Pazientzia handikoa eta irmoa izanik, zama horrek ez dio burua makurrarazi. Eta kartzelak bera baino berak garaitu du kartzela.