- Top 14
Galdu arren, Biarritzek lehenengo jarraitzen du
STADE FRANÇAIS 21
BIARRITZ 16
DONOSTIA
Biarritzek galdu egin zuen atzo Parisen, baina lapurtarrek sailkapeneko lehen postuan jarraitzen dute. Atzo Parisen lehian aritu ziren bi taldeen helburua Ligaren amaieran estraineko lau postuetan izatea izango da, gero finalerdiak jokatu ahal izateko, eta oraingoz, helburu horren barruan daude biak.Atzo Parisko taldeak gehiago zuen jokoan, Biarritzek gainerakoei alde dezentea kentzen baitzien, eta frantziarrak, berriz, laugarren postuan zeuden, eta galduta lehen lau horietatik at geratzeko arriskua ere baitzuten. Hori nabaritu egin zen, batez ere bigarren zatian, lehenengoan Biarritz hobeto aritu baitzen. Etxekoak aurreratu ziren markagailuan zigor-kolpe bati esker, baina bosgarren minuturako Dupuyk berdindu egin zuen beste zigor bati esker, eta 25.enean 3-10era gehitu zuten aldea, Bobok zuri-gorrien entsegua egin baitzuen, eta Dupuyk transformatu egin zuen. Atsedenera joan aurretik, ordea, Stadek emaitza murriztu egin zuen, beste zigor bati esker, eta 6-10ekoarekin joan ziren atseden hartzera. Bigarren zatian erasora atera zen talde frantziarra, eta partidari buelta emateko gai izan ziren, bi entsegu ere eginda. Amaieran, puntuak etxean geratu ziren. Ia 80.000 ikuslek jarraitu zuten partida zuzenean, nahiz eta telebistan ere bazen.
|
