ESTANBUL
Hainbat aditu turkiar eta kurdu Istanbulen bildu dira Estatu turkiarrak herri kurduarekin duen auzia aztertzeko.«Turkian auzi kurdua, irtenbide demokratikoaren bila» titulupean, bi egun iraungo ditu bilerak Bilgiko unibertsitatean.
Ez da atzo hasi zena auzi honi buruz egiten den lehen bilera, baina bai garrantzitsuena, parte hartzaile kopurua eta mahai gainean jorratuko dituzten gaiak kontuan hartuta; horien artean dira gatazkaren historia, irtenbidearen bidean emakumearen eta komunikabideen papera eta turkiar unionismoaren hazkundea eta bilakaera.
«Orain dela 20 urte horrelako jardunaldi bat Istanbulen egingo zenik pentsatzerik ere ez zegoen», ziurtatu du antolatzaileetariko batek, Ercan Karakas Kultura ministro ohiak.
Eskuin muturreko taldeen mehatxupean bildu dira parte hartzaileak, tartean unibertsitate-irakasleak, politikoak eta kazetariak. Hala ere, bere burua ezkertiartzat duen unionista talde bat bildu zen atzo unibertsitatearen inguruan jardunaldia salatzeko.
Poliziak unibertsitatea inguratu zuen eta sartzerakoan parte hartzaileak miatu.
Turkiak bere etorkizuna Europar Batasunean nahi duela eta, «egia da horrek samurtu egiten duela horrelako jardunaldi bat antolatzea», baina auziak zegoenetan jarraitzen duela ohartarazi du Karakasek.
Auzi gordina da, gainera, Armada turkiarraren eta PKK kurduar gerrilaren arteko gerra (37.000 hildako eta milaka herri suntsitzea, besteren artean, eragin dituena) piztu egin delako azken egunotan.
Jardunaldiaren lehen egunean armak uzteko deia egin diote PKKri hainbat adituk, «irtenbide federala samurtzeko».
