Hiru manifestazio hilaren 18an osasun zerbitzu euskaldunak aldarrikatzeko
IRUÑEA
«Osasun zerbitzu guztiak euskaraz!» lelopean, Euskal Herrian Euskaraz taldeak manifestazio bana antolatu du martxoaren 18rako Barañainen, Hernanin eta Durangon. Izan ere, atzo Iruñean emandako prentsaurrekoan azaldu zutenez, badira urte batzuk herri horietan osasun administrazioa euskalduntzearen aldeko lana abiatu zuela EHEk. «Urte askotako borroka horretan beste urrats bat da orain planteatzen duguna», agertu zuten talde euskaltzaleko kideek. Agerraldian, hiru herrietako ordezkaritza bana ere egon zen.«Egunero jasan behar izaten ditugun zapalkuntza eta gutxiagotze egoerek argi agertzen dute egun indarrean dauden politikek ez dituztela hizkuntza eskubideak bermatzen, osasun zerbi- tzuetan bezala gainerako arloetan ere», salatu zuen EHEk; eta, hori dela-eta, nabarmendu zuen aipatu politika horiek, oinarrian dituzten legeriak eta Euskal Herrian ezarrita dauden esparru juridikoak «agortuta» daudela. Osasun zerbitzuetan, euskararen eta euskaldunen eskubideen egoera «larria» dela adierazi zuen, eta arduradun politiko eta instituzionalen jarrera, berriz, eskasa eta borondaterik gabekoa: «Ez dute egoera gainditzeko neurririk hartzen. Bakoitzak bere mailan, baina guztiek dute erantzukizuna aferan». Barañainen 18.00etan abiatuko da mobilizazioa, herriko plazatik, kalejira moduan; aldiz, Hernanin (Gu- darien enparantzatik) eta Durangon (Andra Maritik) 19.00etan hasiko dira manifestazioak. «Guztion indarra beharrezkoa delako», herritar oro deitu zuen parte hartzera erakunde euskaltzaleak.
|
