BAIONA

Gaur irabaziko balu, mailari eusteko borrokan beste urrats bat egingo luke taldeak, eta ez da ahaztu behar, beste alde batetik, zuri-urdinek bi partida gutxiago dituztela jokatuta. Horietako bat, gainera, asteazkenean jokatuko dute.

Joan den astean lortutako garaipenak indar handia eman die euskaldunei, eta itxaropentsu daude gaurko partidarako. Zaleek ere beste irribarre bat dute aurpegian, nahiz eta jakin aurreko astean kanpoan lortutako puntuek ezer gutxirako balioko dutela gaur horrek jarraipenik izaten ez badu.

Ia-ia Aviron bezainbeste du jokoan, ordea, Croix de Savoiek, hori ere mailari eusteko borrokan ari baita. Gaur Baionan galduko balu, Aviron puntu bakar batera izango luke, eta hori ere ez du nahiko. Beraz, bientzat izango da asko jokoan gaur, Baionan.

Jokalariei dagokienez, Avironek Sergent berreskuratuko du, partida bateko zigorra bete baitu. Jokatzeko moduan ez daudenak, ordea, Estrade eta Lalane dira, eta zuri-urdinak ederki ari dira nabaritzen bi jokalari horien hutsuneak. Azkeneko orduko aldaketarik ez bada, honako hau izango da hamaikakoa: Ruffier, Lestage, Talmont, Laporte, Sergent, Choplain, Chakir, Louit, Vaz, Vareilles eta Ipharagerre. Hori baieztatzen bada, Bouet, Bidegain, Vaz, Lancien eta Ech Chergui aulkian geratuko dira. Norgehiagoka 19.30ean jokatuko dute.