BILBO

Hori dela-eta, LABek dekretuaren inguruko zenbait zehaztapen egin zituen. Alde batetik, Euskal Autonomi Erkidegoko osasun sisteman dauden itxaronzerrendak laguntza medikoa behar duten pertsonentzat arazoa direla salatu zuen, Osakidetzak ez baitu laguntza mota hori bermatzen.

Beste aldetik, osasun zerbitzuaren gerentziak eskainitako datuek «errealitatea itxuraldatzen» dutela kritikatu zuen; izan ere, erregistroek ez dute Osakidetzan bizi den «egoeraren saturazioa» islatzen.

Gainera, sindikatuaren ustez, arazo larri horren aurrean, Osakidetzako kudeatzaileek «konponbide ez eraginkorra» eraman dute aurrera. LABen aburuz, zerbitzu publikoak dekretuak ezartzen duen epean gaixoak zaintzen ez baditu, azken horiek kontsulta pribatuetara joango dira.

Hortaz, arazo larri horrekin bukatzeko neurririk hartzen ez dela kritikatu zuen: «Badirudi Lakuako Gobernuaren asmoa kalitatezko osasun zerbitzu publiko bat sortu beharrean, osasungintza pribatua sustatzea dela».

Era berean, sindikatuak aditzera eman zuen «pribatizaziorako neurri ezkutu horiek» sistema deskapitalizatu besterik ez dutela egiten, eta, modu horretan, gizartearen eskari aldakorrari erantzun bat emateko beharrezkoak diren erabakiak definitzen ez dituztela salatu zuen.

Sindikatuaren proposamenak

Egoera horren aurrean, LABek zenbait proposamen jarri zituen mahai gainean. Alde batetik, kudeaketa eta finantziazio neurriak hartzea beharrezkoa dela planteatu zuen. «Hala, baliabideen optimizazioa izango da, eta azpiegitura tekniko hobeak sortuko dira». Horrez gain, kirofanoetan goiz eta arratsaldeetako txandak egon daitezela eskatu zuen, baita ordutegi zabala duten kontsulta espezializatu deszentralizatuak presta ditzatela ere. Gainera, deuseztatutako ohe ospitalarioak berriz ireki behar direla aldarrikatu zuen LAB sindikatua.

Horiek guztiak izan ziren sindikatuak proposatu zituen neurriak, itxaronzerrenda luzeen arazoari aurre egiteko.