Bertso Eskolen Eguna, Oiartzunen
OIARTZUN
Gipuzkoako Bertso Eskolen Eguna datorren larunbatean ospatuko da Oiartzunen. Bigarren aldiz antolatu den festa atzo aurkeztu zuten. Ekitaldian Felix Irazustabarrena Gipuzkoako Bertsozale Elkarteko lehendakaria, Unai Muñoa Bertso Eskolen Sareko eragilea, Ander Lizarralde Oiartzungo Bertso Eskolako kidea eta Jagoba Larburu Oiartzungo Udaleko Euskara eta Kultura zinegotzia izan ziren.
Irazustabarrenak bertso eskolak bertsolaritzaren transmisiorako oinarri direla eta izango direla adierazi zuen. Zeregin horri hobeto erantzuteko, sarea antolatzen ari dira Gipuzkoako Bertsozale Elkartearen partaidetzarekin. 30 bertso eskola daude Gipuzkoan, eta haietan, 350 ikasle.
Egitaraua goizeko 10etan hasiko da, eta ordubetez jolasa izango dira plazan. Gero gazteen jaialdia iragarri dute ikastolan. Arratsaldean jolasak eta bertso antzerkia izango dira, azken hori udaletxean eta Oihana Bartra eta Iker Zubeldia trikitilariekin bertso kalejira.
|
