PRAGA
Europako erdialdeko herrialdeak ibai nagusiei begira daude. Ur maila apurka-apurka igotzen ari da, baina eten barik, eta leku batzuetan gainezka egin du. Etxebizitzak hondatu eta errepideak trabatu dituzte uholdeek. Egoera ez da oso larria, baina 2002ko udako hondamendia berriro gertatuko den beldur dira asko. Txekiar Errepublikako egoera bereziki larria da. Bertako Gobernuak salbuespen egoera ezarri zuen atzo, hamalau eskualdeetako zazpitan. Herrialde horretan sei lagun hil dira eta Elba, Morava eta Moldava ibaien bailaretan kaltetu ugari dago.
Armada dikeak eraikitzen ari da hogei bat herritan eta biztanleak arriskuan dauden herrietatik eramaten.
Joan den astean, hainbat herritarrek pasiboa izatea egotzi zioten Gobernuari. Kritikei aurre egin nahian, atzo krisi kabinetea osatu zuen eta kaltetuentzako 172 milioi euroko diru-laguntzak agindu zituen.
Austrian ere arazoak eragiten ari dira uholdeak. Hildakorik ez, baina kalte material handiak izan dira. Durnkrut herrian Eslovakiako mugatik gertu egoera larritu zen atzo gauean March ibaiaren urak dike bat apurtu zuenean. Horren ondorioz, herria bakartuta gelditu da eta biztanleen erdiak etxeak uztera behartu zituzten agintariek.
Hungarian ere Danubio eta Ipoly ibaien ertzetako lurraldean larrialdi egoera ezarri zuen atzo Gobernuak. Budapesteko auzo batzuetan urak gainezka egin zuen eta eraikin asko hondatu zituen. 10.000 lagun langile bereziak eta boluntarioak lanean ari dira gorantz doan Danubioko urari eusteko.
Alemaniako ekialdeko Sajonia eskualdean ere errekak gainezka egiteko zorian daude. Dresden, ostera, Elba ibaiaren igoera oso motela izaten ari da eta horrek egoerari aurre egiteko denbora eman die. Hala ere, datozen egunotan ez duela atertuko adierazi dute.
Ekologisten salaketak
Herrialde horretako Ingurugiroa Laguntzeko erakundeak salatu zuen 2002ko uholde handien ondoren agintariek ez zituzten neurri egokiak hartu hondamendia berriro ez gertatzeko. Ekologisten esanetan, dikeak sendotzea ez da nahikoa, gero eta handiagoak diren ur haziak absorbitzeko errekaldeak zabaldu beharko liratekeelako, haien ustean.
