Ez zaitzala telebistak engaina
Gaizka Lasa
Kazetaritza ikasi eta errepidean lizentziatu nahi duen batek esatea, agian harriak nire teilatura botatzea izango dela esango duzue, baina telebistaren gezurrez idaztea erabaki dut.Goi mailako txirrindularitza telebistaz eta errepide bazterretik aldi berean ikusteko aukera izan nuen atzo. Eta bi lasterketa desberdin ziruditen. Lasaia, ibilbide erosokoa, erraza eta ia-ia loa eragitekoa bata. Bestea, aldiz, soinu eta kolorez betea, bizia, azkarra, gogorra eta emozioz betetakoa. Telebistan, Astigarragatik Oiartzunera tropela autobide eroso batetik igarotzen ikusi nuen; Gurutzeko malda hasi orduko bukatu zuten, eta Gaintxurizketan malda behera zihoazela zirudien. Erlaitz nekatu gabe pasatu zutela sinetsarazi nahi izan zigun telebistak, baita Jaizkibel plater handiarekin igotzen dela ere. Baina entrenamenduetan oinarrituta, Oiartzun inguruan zabalean oso metro gutxi daudela hitz ematen dizuet, Gurutzek gutxienez bi kilometro dituela, Erlaitz igotze hutsak baduela meritua eta Jaizkibelen malda dagoela. Txirrindulariek atzo afaria irabazi zutela, alegia. -
|
