Oskorrik «The Pub Ibiltaria 10» kaleratu du
BILBO
Oskorri taldeak “The Pub Ibiltaria 10” diskoa aurkeztu zuen atzo. Diskoan hamazazpi kantu «berri» kaleratu dute. Zuzeneko grabaketa iazko abenduaren 21ean, Santo Tomasen, Bilboko Pio Baroja plazan egin zuten.
Aurrekoetan bezala, abesti berri hauetan ere oreka naturala bilatzen du talde bizkaitarrak, bai euskalkietan, bai tematikan: festaren tempo arinak eta maiteminez osaturiko balada sentikorrak daude. Kantutegi herrikoia berreskuratzerakoan, Oskorri taldeak historiarekin fideltasunari eutsi dio, jatorrizko bertsioak errespetatuz.
“The Pub Ibiltaria” izeneko proiektua 1997an sortu zen. Herri kanta ezagun eta ezezagunen sorta zabal bezain oparoa eman izan du, urtez urte. «Taldean kantatzea osasuntsua da. Gainera, aurreko belaunaldietan sortu eta kantatutako abestiak geure egitean, hurrengo belaunaldientzat ere kulturari bizirik eusten ari garen ziurtasuna izan behar dugu», esan dute.
|
