Leia elkartea sostengatzeko deialdiak, zabalduak
BAIONA
Batasunak, Abertzaleen Batasunak (AB), Akitania eskualdeko Berdeek eta LAB sindikatuak ondoko asteartean auzipetuko duten Leiako kideari sostengu osoa helarazi zioten atzo, eta egun berean eginen duten elkarretaratzera deitu zituzten herritarrak.Izan ere, joan den azaroan, 2x2 bidearen bultzatzaileak Donapaleura auzapezei proiektuaren berri ematera joan ziren. Eta, ekitaldia egiten ari ziren bitartean, arazorik ez izateko, auzapezak herriko zenbait karrika zeharkatzea debekatu zuen. Hala eta guztiz ere, 2x2 proiektuaren aurka dagoen Leia elkarteak protesta ekitaldiak egin zituen, eta kale batzuetan pintatzeak egin. Alde horretatik, herriko auzapezak elkarteko kide bat auzipetu du, eta «gune publikoa suntsitu» izana leporatzen dio.
Luzamendua Auzia ondoko asteartean izanen da, eta egun berean, Baionako epaitegiaren aurrean elkarretaratze bat eginen dute. Bai Batasunak, baita ABk, LABek eta Berdeek ere, kaltetuen, laborarien, hautetsien eta garapen orekatuaren alde borroka eredugarria bideratu duen Leia elkartea «ahuldu eta kriminalizatu» nahi izatea salatu zuten. LABek, berriz, Euskal Herrian dauden garraio proiektuetarako «luzamendu» bat finka dezatela eskatu zuen.
|
