Lau zerrendek berriro hautagaiak aurkeztu ahalko dituzte Azkainen
AZKAINE
Hirigintza esparruko hainbat gorabehera medio, Azkaineko Udalbatzaren gehiengoak dimititu ostean, igandean egin ziren berria aukeratzeko hauteskundeak. Aurkeztutako lau zerrendetatik inork emandako bozen erdia gainditu ez, eta guztiek %10 baino gehiago lortu dutenez, datorren igandean egingo den bigarren itzulian berriro aurkezteko aukera izango dute. Hala eta guztiz ere, 48 ordu, hau da, gaur arratsera arte dute balizko hitzarmenak egin eta zerrendak bateratzeko, bataren edo bestearen alde, edota beren zerrendari uko egiteko.
Parte-hartze bikaina (%80) izan zen igandean, eta orain artean alkate izandako Jean-Louis Laducheren zerrendak eskuratu zituen boz gehien (%36).
Ustekabea, halere, Andde Luberriagaren zerrendaren emaitza izan zen. Hogeita lau urtez auzapez izandakoak eta aspaldi politikatik aldendua zegoenak %31 lortu baitzuen. Jean-Louis Gracyk zuzendutako «Geroa eraiki» hautagaiek, berriz, %18 erdietsi zuten eta kutsu abertzaleko Alain Charrieren «Ideki» zerrendak bozen %15 bereganatu zuen.
Lehen aldia da zerrenda itxien sistema erabiltzen dena Lapurdiko herrian. Izan ere, 2001ean Udalbatza aukeratu zutenetik, biztanleria asko emendatu da (3.900 biztanle dira orain) eta ez dute orduan bezala, zerrenda irekiak baliatzeko aukerarik izan.
Hortaz, zerrenda bakoitzak 27 hautagai aurkeztu ditu. Guztietan garaile ateratzen denak gehiengo indartsua lortuko du, Udalbatzako 20 hautetsi bereak izango baitira, 2008an egingo diren hauteskundeen bitartean bederen.
Hitzarmenak egiteko harremanetan dabiltza orain zerrendetako arduradunak, baina egoera tematua dagoenez gero, zaila da jakitea zein itun egingo diren. Laduchek egindako adierazpenen arabera, «azkaindarrek aro berriari ekiteko gogoa» erakutsi dute, eta Charrieren ustez, emaitzak ikusita, ez da «gauzak aldatzeko borondaterik» sumatzen eta «egoera gatazka- tsuan» jarraitzen dute. Beraz, astean zehar ikusiko da ekainaren 11n zein zerrenda aurkeztuko diren.
|
