AEKren aldeko bultzada Larrabetzun
LARRABETZU
Bi urteko etenaldiaren ondoren, Larrabetzuk hartu zuen atzo beste AEK Egun bat. Jardunaldian festa giroa nagusitu zen, eta, eguraldia ere lagun zutela, adin orotako euskaltzaleentzako egitarau oparoa izan zen aukeran. Nolanahi ere, antolatzaileek nabarmendutakoaren arabera, ekitaldiak bazuen helburu edo izaera berezirik ere.Alegia, ikasturtean ikasitakoa plazaratzeko aukera eskaini nahi izan zuen atzo AEK-k. Eta, Euskal Herriko hainbat euskaltegitan euskara ikasten dabiltzanekin ere elkartzeko beta izan zuten bertaratutako herritar guztiek. Azken finean, «mintzamen saio erraldoia» izan zen, guztia ere festa giroarekin uztartuta. Hala, ikasle, euskaltzale eta irakasle ugarik egin zuten bat deialdiarekin, eta horien guztien parte-hartzea sustatu nahian, egitarauak ekimen ugari uztartu zituen: bertso saioa, Xiba jokoa, Kukubiltxoren estreinako “Kukubel 2.0” ikuskizuna, zein Athleticeko jokalari ohien eta AEK-ko ikasle eta irakaslez osatutako taldearen arteko futbol partida, kasu. Bi urteko etenaldiaren ondoren, beraz, «guztientzako jaialdi nazionala» izan zen Larrabetzukoa. Eta, paraleku hori hautatu izanak ere, arduradunen esanetan, izan zuen bai arrazoi zehatz bat. Izan ere, Txorierriko AEK-k 30 urte bete ditu aurten; eta Derioko Txepetxa euskaltegiak, berriz, 20. urteurrena ospatzen du. Hartara, urte hauetan guztietan egindako lanagatik bere aitortza eskaini nahi izan zien atzo AEK-k jaialdiaren bitartez. Ekitaldi horren aurkezpen agerraldian, adibidez, Kattin Bergara Nazio Batzordeko kideak zera azaldu zuen: «Euskara eta euskaltzaletasuna ez litzateke posible izango lan hori egingo ez balute, eskualdean euskalgintzan dihardutenak batu eta indartu baititu Txorierriko AEK-k». Nolanahi ere, eskualdekoentzat ezezik, «Nire, hire, haren, gure, zure, zuen, haien... denon jai» bilakatu zen hitzordua.
|
