San Antonio jaiak Igorren
«Andreok eta amok asko dugu esateko, eta adin gehiagokoek are gehiago»
Irune Elexpe eta Mari Sol Gurtubai Ai Ama!! jai
koadrilaren sortzaileetako bi dira. Txupinazoa jaurti aurretik aurkitu genituen
azken prestakuntzak lotzen. Urduri baino, beren filosofian sendo ikusi genituen.
Heldu da andreen ordua.
Zelan sortu zen amen koadrila bat sortzeko ideia?
Andreak beti egon dira senarraz edo seme-alabez arduratuta eta jaietatik aparte, batez ere, adineko andreak, zeren guk geuk ez dugu indar handiegirik behar jaietan egoteko, baina 50 urtetik gorakoek beti behar eta ondokoei begira, baina egundo ez dute parte hartu. Hesitik ikusten dituzte zezenak, baina beste aldera pasatzeko gogoa ere badute. Horrela sortu zen, kartelak ipini eta orduan pentsatu genuen sei lagun batuko ginela, kanpoan burua erakusten dugunak beti, baina apurka apurka ia 60 andre gara.
Zer ama klase biltzen ditu talde berriak? Gazteak, alargunak, ezkonduak, bananduak, eta
ama ez diren batzuk ere etorri dira. «Ni ama ez naiz, baina estoy en edad», esan
zigun batek, eta aurrera. Gazteenak 22 urte izango ditu eta 70 zaharrenak, eta
gainera horiek, zaharrenak, martxosoenak dira. Gauzak egiteko gogo gehien
dutenak dira. Andreok rol batzuk izan ditugu ezarrita, burua ezin dugula
horrenbeste erakutsi, eta lotsa hori galtzea kostatu egiten da, baina tira.
Andreok eta amok asko daukagu esateko, adin gehiagokook are gehiago, eta aintzat
hartzen ez bagaituzte, zarata egin beharko dugu.
Zer-nolako ekarpena egiten diezue jaiei? Jaietan denean hartzen dugu parte, erreka jaitsi
behar dela, bada gu ere barkua gabiltza egiten, orga karreran ere pisu gutxien
daukana sartuko dugu. Beste edozein koadrilak egiten duena egingo dugu, txosnan
ere dagozkigun txandak egingo ditugu.
Orduan, etxean, zuen esperoan ez egoteko esan duzue aurten.
A bai, bai. Erosketak egin ditugu, armairuak topera bete, eta kalera irten gara, zeren orain arte gizona eta seme-alabak kanpoan, eta andreak etxean beharrean. Agian gurea ez, baina gu baino zaharragoen bizimodua horixe izan da, eta andre horiek zeresan asko ere badute, jaietan eta jaietatik aparte. Horregatik, gure gogoa da gero ere jarraitzea, jaiekin ez da dena amaituko.
Zein da zuen eguneko plana?
Egunero kalean biltzen gara, egunero dauden ekintzetan, gehienetan bai, behintzat. Zein da zuen bereizgarria? Kamiseta egin dugu, Simpsondarren andrearen irudiarekin,
eta “Ai Ama!! Igorreko Jaiak” dio.
|
