- Trinidad y Tobagok eman zuen ezustekoa B Multzoan -
Ingalaterrak haizea alde duela ekin dio
·Gamarrak hirugarren minutuan bere atean egindako golarentzat ez zuen erantzunik aurkitu Paraguaik
INGLATERRA 1
PARAGUAI
0
GASTEIZ
Hasiera-hasieratik alde izan zuen haizeari jarraituz, garaipen batekin hasi du Ingalaterrak Alemaniako Munduko Txapelketa, erakustaldiak beste baterako utziz. Paraguairi, aldiz, ezbehar guztiak lehen minutuetan pilatu zitzaizkion, partida erabaki zuen Gamarra kapitainak bere atean egindako gola barne, eta zoritxarrari aurre egiteko indarra eta erasoko jokoa falta izan zituen.Talde handienek ere beldur handia izan ohi diote Txapelketako estreinako partidari, baina konturatzerako dena alde izan zuen Ingalaterrak. Izan ere, Paraguaik zoritxar guztia beretzat batu zuen eta hirugarren minuturako markagailuan aurretik jarri ziren Erikssonen mutilak. Beckhamek arean bikain jarritako falta batean, Gamarra atzelaria Oweni aurreratu nahi izan zitzaion baina urrundutako baloia bere atean sartu zuen. Ez ziren hor amaitu hegoamerikarren ezbeharrak, zortzigarren minuturako, atezainak, min hartuta, zelaia utzi behar izan baitzuen. Kaos horretan, iparra galdu zuen Paraguaik atezain berriak area barruan falta egin zuen baloia birritan eskuekin hartuz eta hortxe heldu ziren Ingalaterraren minuturik onenak. Gerrard, Lampard eta Beckham nagusi ziren zelai erdian, baina baloia ondo mugitu arren, ez zuten Crouch erraldoiarekin asmatu eta partida erabakitzeko aukera galtzen utzi zuten.
Paraguairen ezina
Lehen zati osoa haizeari aurre egiten eman ostean, ia 45 minutu behar izan zituen Paraguaik Ingalaterraren atera Valdezen jaurtiketa baten bidez hurbiltzeko. Ezin okerrago jokatu ostean, haizearen norabidea aldatuko zen esperantzaz zelairatu ziren guaraniak bigarren zatian eta europarren erauntsia asko jaitsi zen arren, erasoko jokoa antolatuko zuen norbait faltan bota zuen Paraguaik. Valdez eta Santa Cruz saiatu ziren, baina Lamparde, areaz kanpoko bi jaurtiketekin izan zuen hurbilen Ingalaterraren bigarrena.
|
