Administrazioan Euskaraz-en esanetan, Auzitegi Gorenaren epaiak ez du behartzen Nafarroako Gobernua elebitasuneko politika izatera
IRUÑEA
Joan den astean ezagutarazi zuten Nafarroako Gobernuak euskararen aurka osatutako bi foru-dekretu bertan behera geratzen direla berretsi berri du Auzitegi Goren espainolak. Euskara Kultur Elkargoak jakinarazi zuenez, esaterako, orain, errepide-seinaleak ere ele bitan jarri beharko ditu Foru Gobernuak. Administrazioan Euskaraz Taldeak, ordea, esan horiek ezeztatu ditu. Honen ustez, Auzitegi Goren espainolak ez du kaleratu elebitasunaren inguruko erabakirik; Nafarroako Gobernuaren kasazio errekurtsoa eta bertako bi txosten Administrazioan euskara ukatu eta eremu mistoan arautzen dituen dekretuak argudiatzen ditu horietan Gobernuak ontzat jo edo ez soilik aztertu du.
«Ez da elebitasunaren aldekoa» Horiek hala, atzo bertan ere, EKEko ordezkariak Auzitegi Gorenaren epaiaz prentsaurrekoan mintzo ziren bitartean, Administrazioan Euskaraz Taldeak horien eraginari buruz zalantzak agertu zituen. Izan ere, azken talde horren esanetan, «zoritxarrez», epaiak Nafarroako Gobernuaren kasazio errekurtsoak baztertzea besterik ez du jasotzen. «Ez du elebitasunaren aldeko epaia eman, eremu mistoari dagokionez», jarraitzen du Administrazioan Euskaraz Taldeak. Agian, orain, Nafarroako Gobernuak eremu mistoan elebitasunaren aplikazioa aldaraz dezakeela esan du euskararen aldeko talde horrek. Baina era berean, argi dio «ez dela egia» esatea Auzitegi Gorenak Foru Gobernua jarreraz aldatzera behartzen duela.
|
