ALEGIA

Izeta II.a, Izeta III.a, Ostolatza eta Irigoien lehiatuko dira. Bakoitzak zilindro berria, kubikoa eta bola erabiliko ditu, guztiak ere 125 kilokoak, eta bakoitzarekin lanean aritzeko hiru minutuko txandak izango ditu kirolari bakoitzak.

Sariak ere ez dira txantxetakoak. Lehenengoak 1.050 euro kobratuko ditu. Bigarrenak 900, hirugarrenak 750 eta laugarrenak 550. Guztia, Alegian, Larraitz auzoko plazan izango da, eta sarrera ordaindu beharrik ez da izango, debalde izango baita. Eguraldi txarra izanez gero, pilotalekuan jokatuko dute. Harri-jasotzaileez, gain, aizkolarien erakustaldia ere izango da ikusgai.

Lehiaketa horrek, gainera, sekulako ikusmina piztu du,Izeta II.a bertan izango baita, eta haren eta Ostolatzaren arteko dema ikusteko irrikaz daude zaleak. Aiarrak lehiaketa ofizialetan ez parte hartzeko erabakia hartua du, eta bera torneoetan eta erakustaldietan bakarrik ikusi ahal izango da. Gainera, Aimar Irigoien ere bertan izango da haiek estutzeko asmotan, baita Izeta III.a ere. Patxi Jauregi da antolatzaileetako bat. Hark azaldu zion GARAri lehiaketa horren nondik norakoa: «Iaz festa batzordeak herri kirolari bultzada eman nahi ziola-eta, Aimar Irigoienen marka ahalegina jarri nahi izan zuen, eta sekulako arrakasta izan zuen. Aurten, berriz, bide beretik jarraituz, aurrerantzean ere jarraipena izango zuen zerbait antolatu nahi zuten, eta harri-jasotzaileen lehenengo Txintxarri Txapelketa jarri dute», esan zuen.

Parte hartzeak gonbidapen bidez egin dira, eta pisu bereko harriak erabiltzeko hautua egin dute antolatzaileek. Horrela, 125eko zilindro berria harri txikien txapelketa ofizialetan erabiltzen dena da. 125 kiloko bola, berriz, harri handien txapelketa ofizialetan erabiltzen den harria da, eta 125eko kubikoa normalean lehiaketetan ez da erabiltzen.

Lehiaketa hasi aurretik egingo dute zozketa, eta horren arabera egin beharko dute lan kirolariek. Sailkapenean berdinketaren bat izanez gero, lanean aurretik aritzen dena geratuko da sailkapenean aurretik. Gero, dopingaren kontrola pasatu beharko dute, eta hori zozketa bidez erabakiko da. Antolatzaileek orain zaleen erantzuna espero dute: «Hemen inguruan, baita Azpeitia aldean, edo Zarautz aldean ere, asko ari dira honi buruz hitz egiten, eta jende asko etortzea espero dugu. Iaz Aimarren marka ikusteko plaza gainezka egon zen, eta aurten ez dugu gutxiago espero. Sarrerarik ez da kobratuko, eta euria egiten badu, aterpea ere badugu. Beraz, ez dago zertan kezkatu, eta seguru gaude gainera kirolariek goi mailako ikuskizuna emango dutela», esan zuen Patxi Jauregi antolatzaileak.