DONOSTIA

Donostiako Illarra jatetxeko sukaldariak zera adierazi zuen: «Oso liburu erraza da, eta batez ere sukaldatzen dakien jendeari dago zuzendua». Abalek profesionalei ere zuzendu nahi die liburu hori, bertatik ideiak hartzeko baliagarri izango zaielakoan.

Bestalde, oso lan pertsonala dela nabarmendu nahi zuen: «Ikuspegi oso pertsonaletik egindako lana da. Errezeta guztiak nireak dira. Azken urte hauetan lanean egon naizen sukaldeetan sortutako ideietan oinarritutako bilduma da. Maitasun osoa jarri diot».

Goi sukaldaritzako platerak egiteak zerbait konplikatua dirudi, baina bere bildumaren «erraztasuna» nabarmendu zuen hernaniarrak: «Gure helburuetako bat etxeko jendeari sukaldaritzako teknikak ahalik eta modurik errazenean gerturatzea izan da. Azken finean, goi sukaldaritzak gauza asko hartzen ditu barne; sukaldariaren ikuspegia, otorduaren izaera, sukaldaritza teknikak... Gauza horiek guztiak gerturatu nahi izan dizkiogu etxeko jendeari. Goi sukaldaritza etxean egiteko aukera eman nahi dugu liburu honekin».

Sukaldariek erabili ohi duten tresneriaz ere hitz egin zuen Abalek: «Gutxi gorabehera beharrezkoa izango litzatekeen tresneria izendatu dugu. Egia da etxean errezeta batzuk egiteko beharrezkoa litzatekeela tresneria profesionala esku artean izatea. Baina ez dago erabili beharreko tresneria oso garestia edo eskuraezina duen errezetarik. Edozein etxeko sukaldarik eskuratzeko modukoa da. Etxean egin ezin daitekeena automatikoki alde batera utzi dugu». Asier Abal Martin Berasategi gastronomia lehiaketako garaile izan da aurten. Lehiaketa berean bi sari jaso zituen; errezetarik onenari saria, eta errezeta berritzaile onenari saria. Nolanahi ere, liburua argitaratzea aurreikusi gabeko egitasmoa izan zela adierazi zuen: «Ustekabez betetako urtea izan da. Gauza guztiak beren kabuz sortzen joan dira. Idoia Arozenak jatetxera deitu zuen nirekin hitz egiteko. Menuren bat prestatzeko eskatuko zidala uste nuen, baina liburua idazteko proposamena egin zidan. Aurten hasi gara liburua idazten, eta urte berean kaleratu dugu».

Idoia Arozena editoreak eta Mikel Corcuera gastronomia kritikoak lagunduta egin zuen aurkezpena hernaniar gazteak. Arozenak adierazi zuenez, jende askoren beharrak asetzeko helburuarekin ateratako liburua da: «Etxean gonbidatuentzat otordu bat prestatu behar dugunean, zerbait berezia, tentagarria, ezberdina prestatzea gustatzen zaigu. Liburu asko oso zailak izaten dira, baina bilduma honek oso modu errazean jaki bereziak egiteko aukera ematen du».

Mikel Corcuera gastronomia kritikoak gaur egungo sukaldaritzaren «mugikortasuna» nabarmendu nahi izan zuen: «Gaur egungo sukaldaritza inoiz baino irekiagoa da, dinamikoagoa. Garai batean sukaldari zenak milaka errezeta ezagutu behar zituen, eta guztiak ziren bezala egitera behartzen zuten. Egoera hori asko aldatu da. Liburu honekin, sukaldaritzarik preziatuena, landuena, etxeko sukaldera hurbildu nahi izan da». Sukaldariaren «lehiakortasun positiboa» nabarmendu zuen.