Askatasuna: «Garesera, errepresioa salatzera»
IRUŃEA
«Adierazpen askatasuna» lelopean, Mena enparantzan elkarretaratzea egingo dute gaur, 20.00etan, Garesen. Herriko hainbat taldek antolatu du mobilizazioa, jaietako Riau-Riauan uztailaren 24an ustez izandako istiluengatik epaitegietan zabaldutako auzia salatzeko. Izan ere, Garesko gazte bat auzipetu baitute Foruzaingoak eginiko txostena baliatuta, eta «atentatua» eta «mehatxuak» delituak leporatu dizkiote. Askatasunak bat egin du deialdiarekin.
«Azkenaldian, Foruzaingoaren jarrera errepresiboa arduratzeko modukoa da. Nafarroako eskuinaren interesen zerbitzura dago eta horren jarrera politikoak defendatzen ditu indarra erabiliz», ohartarazi zuen amnistiaren aldeko antolakundeak, eta honakoa gaineratu: «Egunetik egunera, errepresioaren bideari eusten diola ikusten ari gara».
Aitzitik, askatasun demokratikoak errespetatuak izango diren egoera behar dela nabarmendu zuen, eta, hori lortzearren, mobilizaziorako deia egin zuen.
Auzibidean dagoen Garesko gazteak urtebete eta hiru urte arteko kartzela zigorra jaso dezake, Riau-Riauan, herriko gazteekin batera eta jai-giroan, Udalak egindako irregulartasunak salatzeagatik.
|
