OIARTZUN
Euskal Curriculuma sorrera prozesu bete-betean dago, eta 2006-2007ko ikasturtea bukatzerako prestatuta egotea espero dute. Hori adierazi zuten atzo Euskal Herriak Bere Eskola taldeko kideek Oiartzunen egin zuten lehen koordinazio batzarrean. Hartara, epe horretan Euskal Curriculuma aplikazio fasean hasteko moduan egongo dela espero dute.Alde horretatik, Euskal Herriak Bere Eskolak berriz nabarmendu zituen bere ekarpenaren arabera Euskal Curriculumak bete behar dituen lau baldintza: «Euskal Herri osorako baliagarria den bitarteko pedagogikoa behar du izan; biharko Euskal Herria gaurdanik eraikitzeko tresna ezinbestekoa da; nahitaez hezkidetzaren ikuspegia barneratua izan behar du eta pedagogia askatzailea oinarri izango duen bitartekoa izan behar du».
«Bai eskolak euskalduntzeari» kanpaina jarraitzea izango da talde horren beste erronketako bat. «Hezkuntza komunitateak eta gizarteak, oro har, aldarrikapen horri indar berriz eutsi behar diote eta neurri zehatzak aplika daitezen eskaerak bideratu», agertu zuen bide horretan.
Lakuako Gobernuak legealdi honetan Hizkuntza Politika berria kaleratuko du. Euskal Herriak Bere Eskolaren ustez, ez da kasualitatea orain egitea, eta herritarren eskariek behartu dute Administrazioa pauso hori ematera.
Azkenik, Euskal Unibertsitatea da etxeko lanen zerrendan ageri den bestea. «Proiektua definizio fasearen azken fasean dago eta guztion parte-hartzea ezinbestekoa da», agertu du.
