CASTRES 39
AVIRON 15

BAIONA

Bigarren minutuan lapurtarrak aurretik jarri ziren markagailuan Dourthek lortutako zigor-kolpe bati esker, baina berehala hasi ziren arazoak agertzen. Lehendik, hutsune askorekin ziren euskaldunak Castresen zelaian, min hartuta jokalari dezente baitu, eta atzo lehen hamar minutuetan beste bi galdu zituen.

0-3koarekin, Thierryk zelaia utzi behar izan zuen min hartuta. Bi minutu besterik ez, eta jadanik kolpatu bat zuten lapurtarrek, baina zortzi geroago, beste atzelari batek, Berberianek, zelaia utzi behar izan zuen, eta gauzek erabat okertzeko bidea hartu zuten.

Hala ere, Aviron ez zen kikildu, eta aurrera egin zuen. Dena dela, hemeretzigarren minutuan transformatutako entsegu bat egin zuten etxekoek, eta 7-3 aitzineratu ziren. Baina euskaldunen ausardiak oparia izan zuen; Vermisek lapurtarren lehen entsegua lortu zuen, eta Dourthek transformatu zuen. Modu horretan, Aviron 7-10 aurreratu zen. Hala ere, atsedenerako joateko hamar minutu falta zirenean, etxekoek bigarren entsegua egin zuten, eta transfor- matu ez bazuten ere, 12-10 nagusi ziren etxekoak.

Bigarren zatian heldu zen etxekoen beherakada. Bigarren berrogei minutuan, Castres jaun eta jabe izan zen, eta lau entsegu egin zituen. Avironek bat lortuta, zerbait konpontzen ahalegindu zen, baina ezinezkoa zen.

Bigarren zatian Avironek zulo asko utzi zituen atzealdean. Aurten arazo asko ari da izaten taldea lerro horretan. Egia da atzoko neurketan hamar minutuan bi jokalari galdu zituela, eta lehenago ere hutsuneak bazituela lerro horretan, baina horrelako erraztasunak emanda, oso gaitza izango da zerbait lortzea. Avironek ahalik eta azkarrena ahaztu beharko du atzoko porrota, eta minduta dituen jokalariak berreskuratzeko ahalegin berezia egin beharko du datorren larunbatean galtzea arriskutsua bailitzake, bestela, asko atzeratzen has daitekeelako.