Mauleko 100 gaztek pastorala dakarte Azkoitira
DONOSTIA
Bihar goizeko hamaiketan Loiolan emango duten mezatan hartuko dute parte, eta arratsaldean “Jesüs” pastorala aurkeztuko dute Azkoitian. Mauleko San Frantzisko kolegioko ikasleak dira, eta euskara ikasteko lanabes didaktiko moduan erabili dute pastorala. Bihar arratsaldeko bostetan hasita “Jesüs” pastorala emango dute, beraz, Gurea udal kiroldegian. Junes Casenave-Harigilek idatzia du lana, eta barnetegi gisa funtzionatzen duen ikastetxeko irakasleak dira arizaleak. Sophie Larrandaburu eta Maite Iturralde izango dira errejentak; Zuberoako pastoralen historiako lehen errejent emakumezkoak, hain zuzen. Ehun ikasle inguruk hartuko dute parte, gehienak zuberotarrak. Maiatzean egin zuten lehenengo emanaldia Santa Grazikoarekin ez bat egiteko, eta bihar egingo dute bigarrena.
|
