Bizilekuari zentzua eman nahi dion eguna antolatu dute Bastidan
BASTIDA
Euskal Kultur Erakundeak eta Arkitektura, Hirigintza eta Ingurumen Kontseiluen Federazio Nazionalak (CAUE) etxebizitzarekiko harremana aztertu dute, artisten egonaldi baten bitartez. Ekimen hori bukatzeko, Bastidan inprobisazioan oinarritutako performantzia bat eginen dute gaur herri guztian zehar eta, era berean, herriko plazan erakusketa bat ere izango da.
«Bizilekua... leku bizia?» da ikusi ahal izanen diren ikusgarria eta erakusketa elkartzen dituen gaia. Izan ere, arte adierazpen ezberdinen bitartez bizilekuari zentzua eman nahi dio ekintza horrek. Gaiaren inguruan gogoeta egiteko eskatu diete Euskal Herriko eta Bordeleko Les Imprévisibles kolektiboko dantzari eta musikari batzuei Bastidan egin duten egonaldian. Urriaren 4an hasi zen eta gaurko ikusgarriarekin bukatuko da.
Musikari talde batek, bi dantzarik eta bertsolari batek espazioa beteko dute interpretazio artistikoa etxebizitzetara eta herrira eramanez. Ikusleei eraikinekiko beste harreman bat proposatuko diete, beste ikuspegi bat eskainiko diete musika, dantza eta hitzen bitartez. Egituraketa orokor baten barnean artistek inprobisaziorako espazio zabala izanen dute.
Bastida aukeratu zuten, bai Herriko Etxeak egitasmoarekiko atxikimendua adierazi zuelako, eta bai bere oinarrizko hirigintza eta arkitektura aberastasunagatik ere.
Etxea aterpean bizitzeko tokia baino gehiago dela gogora ekarri nahi izan dute Euskal Kultur Erakundeak eta CAUEk. Lehen hitzordua Bastidakoa da, baina urte bukaerarako euskarri pedagogiko batzuk (maketak, CD gidak) aterako dituzte gogoetaren berri emateko.
|
