Salatzearen kontrako eguna urriaren 10ean
·Delinkuentzia aurrezaintzeko legea berriki onartu du Senatuak
Besteren artean eskolako datuak eta langile sozialek erabiltzen duten informazioa fitxategi orokor batean ezartzeko balioko duen delinkuentzia aurrezaintzeko legea Senatuan onartu eta gero, Asanblea Nazionalean bozkatuko dute. Legearen kontrako mobilizazio eguna antolatu dute.
BAIONA
Euskal Herriko Salaketaren kontrako Kolektiboak protesta eguna antolatu du urriaren 10ean, frantses Estatuko kolektibo nagusiak egin duen deialdi orokorrari jarraiki. Taldeak gizartearen arreta bereganatu nahi du. Izan ere, hiru urtez prestatzen egon diren delinkuentzia aurrezaintzeko legea berriki Senatuan onartu dute, eta azaroan Asanblea Nazionalean bigarren irakurketaren ondoren onartzen badute, indarrean jarriko baitute.Barne Ministro Nicolas Sarkozyk bultzatutako legea onartzen badute, gizarteko gizabanako guztiengan eragin lazgarriak ekar ditzakeen ondorioak nabarmendu zituzten atzo Salaketaren kontrako Kolektiboko kideek. Izan ere, lege horren arabera, gizarte langileek beren lanbidearen betebeharretan lortutako informazioa Herriko Etxeari eman beharko diote, eta laguntza beharrean dauden pertsonekiko beharrezko konfiantza hautsiko dute modu horretan. Auzapezek kontrolatzeko eta erabakitzeko botere handia lortuko dute lege berriari esker. Finantzan, osasunean, lanean edo eskolan arazoak dituzten haurren familien informazioa Herriko Etxeko fitxategi sozialean agertuko da legea onartuz gero. Bestalde, auzapezak herriaren segurtasuna arriskuan jar dezakeen jokaeraren bat ikusten baldin badu, pertsona bat hiru egunez psikiatrikoan sartzeko eskubidea izango du. Aldi berean, legearen terminoen subjektibotasuna salatu zuen kolektiboak.
|
