EHUk ikasle eta irakasleentzako egoitza berria ireki du Donostian
DONOSTIA.
Euskal Herriko Unibertsitateak Manuel Agud Querol egoitza inauguratu zuen atzo Donostian. Ikasle nahiz irakasleentzako 300 pertsonarentzako lekua eskaintzen du azpiegitura horrek eta 10,5 milioi euroko kostua izan du. Sarrera ekitaldian parte hartu zuen Hezkuntza sailburu Tontxu Camposen hitzetan, «egoitza hau oso garrantzitsua da bai kalitateari dagokionez eta bai EHUko eskaintza zabaldu eta sinergiak sortzen dituzten ikasle, irakasle eta ikertzaileen mugikortasunari dagokionez ere». Lehendik Bilbon eta Gasteizen daudenekin batera, EHUko egoitzek «ikasi, irakatsi eta ikertzeko kalitatezko eskaintza» aurkezten dutela gaineratu zuen Camposek.
Zabor pusketa batek Atlantisen kalteak sortu zituela esan du NASAk
WASHINGTON.
NASAk atzo jakinarazi zuenez, espazioan zebilen zabor pusketa batek Atlantis espazio-ontziko berogailuetako bateko panel batean kalteak eragin zituen. AEBetako agentziako ordezkari baten esanetan, bi milimetro inguruko zulotxo bat topatu dute Nazioarteko Espazio Estazioan garaturiko misio arrakastatsua amaitu ondoren eginiko azterketa batean. NASAko adituen hitzetan, panel horietako batean kalte garrantzitsuren bat izatea guztiz arriskutsua izan daiteke, horrek espazio-ontziko sistemetan eta tenperatura kontrolagailuetan erasango bailuke. Baina zorionez, ez zen ezer larririk gertatu.
Maria Bengoetxea hil da, memoria historikoa biltzeagatik ezaguna
ERMUA.
Maria Bengoetxea ermuarra ostegunean hil zen, 99 urte zituela eta bere herritarren eta Euskal Birusa taldearen omenaldia jaso baino aste gutxi batzuk lehenago. Emakume hau oso ezaguna zen herrian memoria historikoa eta herriko euskara mantentzen egindako lan handiarengatik. Ehungarren urteurrena ospatzeko aste gutxi behar zituen emakumea ostegunean hil zen eta atzo izan ziren bere aldeko hileta elizkizunak. Ermuako Udalak esandakoaren arabera, guztiz nabarmentzekoa zen herritarrek Txindurri ezizenez ezagutzen zuten emakume honen «neurriz kanpoko memoria».
|
