BELFAST
Belfasten izan dira aste honetan Joseba Azkarraga Lakuako Justizia arloko sailburua, Jon Mirena Landa Giza Eskubideen arloko zuzendaria eta Txus Peña Lehendakaritzako idazkaria. Azkarraga Juan Jose Ibarretxek sortutako Kontseilu Politikoko hiru kideetako bat da, eta bake prozesu horrek Euskal Herrirako eman ditzakeen ikasgaiak biltzea izan du helburu. Horretarako, hogei bilera inguru egin ditu sailburuak.Ondorio nagusietan, Irlandako eta Euskal Herriko gatazken «izaera politikoa» bertan dela nabarmendu du Azkarragak. Haren esanetan, alderdien arteko adostasuna da gakoa, bai eta zazpi urtean behin Ipar Irlandako estatusa erabakitzeko ahalmena ere.
Azkarragak garrantzia kendu dio, ordea, Stormont-eko akordioak erabakiak hartzeko eta gobernuak osatzeko agintzen duen unionisten eta errepublikarren arteko adostasuna lortzeko premiari.
Alderdien arteko akordioa eskuratzeak helburua izan behar duela onartu du Azkarragak, baina hori lortu ezean «gehiengoen araua» indarrean jarri behar dela gaineratu du sailburuak. Horrela ekidin daiteke Irlandan gertatutakoa, bertan Ian Paisley buru duen DUP alderdiak Sinn Fein-ekin gobernatzeari betoa ezarri dio-eta.
Presoak eta desmilitarizazioa
Horrezaz gain, Irlandako pro-zesuan, presoen auzia azkar konpontzea garrantzi handikoa izan dela adierazi du Azkarragak. Han, 1980 urtetik aurrera preso gehienak espetxe berean egon izana eta 1998ko Ostiral Santuko akordioaz geroztik IRAko preso guztiak eta talde lealistetako espetxeratuak bi urteren buruan askatu izana Ipar Irlandako baketze prozesuan elementu erabakigarriak izan baitira.Bestelakoak dira Tony Blair Britainia Handiko lehen ministroak auzi horren inguruan egiten duen irakurketa. Jose Luis Rodriguez Zapaterorekin egindako bileraren atarian, Ipar Irlandan presoak azkarregi as- katu izanagatik Britainia Handiko Gobernuak autokritika egiten duela dioten informazioak kaleratu baitituzte. Gobernu espainolak, behintzat, argudio horri eusten dio.
Justiziako sailburuak, egin berri duen bileren ostean, Ipar Irlandako prozesuan oinarrituta atera daitezkeen irakasgai nagusietatik lau nabarmendu ditu: erresoluzio prozesuan aldeek eduki duten konpromiso indartsua; Britainia Handiko Gobernuak prozesu osoan izan duen funtzio bultzatzailea; preso politikoen kaleratze azkarra eta nazioarteko bitartekariek bete duten papera.
Beste alde batetik, Ipar Irlandako erakunde autonomoak berrezartzeak gizartea adiskidetzeko bidean ekarpena egin duela nabarmendu du Joseba Azkarragak. Bestetik, egoera politiko berrira egokitzeko helburuarekin, Britainia Handian eta Irlandan egin dituzten legegintza aldaketak azkar egin izana positibotzat jo du Joseba Azkarraga Lakuako Gobernuko Justizia sailburuak.
