BAIONA
Euskal Irratiek azken 25 urteetan euskararen erabilera hedabideetan sustatzeko eta euskararen normalizazioa bultza- tzeko egin duten lana aitortu zuen Udalbiltzako Dominique Duhaldek. Atzo sinatu hitzarmenaren bidez, Euskal Herriko Udal eta Hautetsien Biltzarrak irratiak etorkizuneko apustuan lagundu nahi ditu.
Ipar Euskal Herriko irratien federazioko presidente Jakes Agergaraik, Udalbiltza eskertzeaz gain, 1997an irratien federazioa sortu zenetik egindako lana gogorarazi zuen. Bestalde, gazteen lanagatik kendu berri dituzten diru-laguntzak galtzeak irratia egoera txarrean jartzen duela esan zuen.
Federazioko Agus Hernanek jakinarazi zuen diru-laguntzak galtzeak 2007a eta 2010a artean bederatzi lanpostu gutxiago izatera eramango dituela, eta era horretan kalitatezko lana ezin dela egin adierazi zuen.
Aldi berean, Euskal Irratiek Bretainiako irrati federazioak jasotzen duen dirua baino lau aldiz gutxiago jasotzen dutela salatu zuten Euskal Irratiek.
Euskararen Erakunde Publikoari bi mezu helarazi nahi izan zizkion Hernanek; alde batetik, euskara sustatzeko plan berria egitea ontzat jo zuen, baina plana aurrera ateratzeko diru laguntza eskasia salatu zuen. Estatuak, Akitaniako Kontseiluak eta Kontseilu Nagusiak ematen duten dirua gehitu beharko litzatekeela esan zuen.
Bestalde, EEPren eta irratien artean izandako elkarrizketetan azken horien arazoa ongi zehaztu dutenez gero, hurrengo lauzpabost hilabeteetan erakunde publikotik konponbidea espero dutela esan zuen.
