- Desafioa
Olasagastik hordagoa bota dio Miel Mindegiari
DONOSTIA
Joxemari Olasagastik gogor erantzun dio Miel Mindegiak aurreko astean egindako desafio proposamenari. Igeldokoak ez zion heldu Ezkurrakoak botatakoari 20 kana-erdiko eta 12.000 euro alde bakoitzak, baina orain, ongi pentsatu eta gero, sekulako hordagoa bota dio bueltan: 30 kana-erdiko moztu behar, alde bakoitzak 26.000 euro jarrita eta sarreretako dirua irabazlearentzat. Olasagasti Aldanondo Jatetxean egongo da azaroaren 8an zortziak eta bederatziak artean.
Mindegiak ez du oraingoz ezertxo ere esan desafioa ongi aztertu behar duelako. Egin beharreko lana askoz ere luzeago litzateke 10 enbor gehiago eta ezin da ahaztu Nafarroako Txapeldun irten berri den aizkolariak 57 urte dituela. Diru aldetik ere aldea oso handia da. Mindegiak 12.000 euro jokatu nahi zituen gehienez, eta orain bikoitza baino gehiago egongo litzateke jokoan.
Beste behin Olasagasti. Erasun, Azurmendi eta Lasa-Otaño bikotearen aurka apustuak jokatu eta gutxira, beste abentura batean sartzeko prest dago Igeldoko kirolaria.
|
