Lanbide Heziketako III. Azokak 30.000 bisitari hartu nahi ditu
Atzo goizean zabaldu zituen ateak Lanbide Heziketako III. Azokak Barakaldoko Bilbao Exhibition Centre -en. Lakuako Gobernuko Justizia, Lan eta Gizarte Segurantza Sailak, eta Hezkuntza, Unibertsitate eta Ikerketa Departamentuak antolatzen dute azoka, eta 30.000 bisitari inguru jasotzea espero dute aurten.
BARAKALDO
Datorren larunbatera arte Barakaldoko BECen Araba, Bizkaia eta Gipuzkoako Lanbide Heziketako III. Azoka egingo dute, eta, atzo goizeko inaugurazioan parte hartu zuten ordezkarien arabera, azoka zabalik egongo den bost egunetan 30.000 bisitari inguru hartzea espero dute.Aurtengo edizioa, gainera, berezia izango dela adierazi zuten, Finlandia, Danimarka, Mexiko eta Txileko hainbat ikastetxetako ordezkariak etorri baitira «gure Lanbide Heziketako sistema ezagutzera». III. azoka honek 21 lan arlo ezberdinetako ordezkaritza zabala biltzen du eta batez ere ikastetxeetako orientatzaileei, Lanbide Heziketa hasteko adinean dauden ikasleei eta euren familiei zuzenduta dago bereziki. Hori dela-eta, bisitariek, zein ikasketa mota eskaintzen diren, horietatik bakoitzak zein aukera ditzakeen eta horiek zuzentzen diren lanbideetako langabezi tasak zenbatekoak diren ere bertatik bertara ezagutzeko aukera izango dute. Azokaren helburuetako beste bat, azkenik, emakumeak arlo tekniko eta industrialetako ikasketetara erakartzea da.
|
