Andoaingo Galardi haur eskolako irakasleak, 0-3 zikloa haustearen kontra
ANDOAIN
Andoaingo Udaleko atzoko osoko bilkuran atzera bota zuten Galardi Haur Eskolako guraso talde batek aurkeztutako mozioa. Mozio horretan zentroaren gainean «premiazko neurriak» hartzeko eskola txiki geratu da, epe ertain eta luzerako planteamendua egiteko eta haur eskolaren inguruko lan-talde bat osatzeko eskatzen zuten gurasoek. Udalbatzak ez zuen mozioa onartu eta gaia «ohiko bideetatik» landuko dela esan zuen.
Guraso talde horrek bezala, udal haur eskolako irakasleek ere salatu dute egoera. «Badirudi jaiotze-tasa handitu egin dela Andoainen, baina ez da oraingoa. Urteak badira haur eskola honetan eskaera adina toki ez dagoela», agertu dute irakasleek. Hartara, ez dute irtenbide egokitzat ikusten 2-3 urteko gela ixtea, Udalak egin asmo duen bezala.
Hezitzaileok 0-3 zikloa haustearen eragina nabarmendu dute. «Esperientziak erakutsi digu zikloa amaitzean haur-eskolatik beste eskoletara joaten diren haurrak benetan ondo prestatuta daudela, bai kognitiboki, bai fisikoki eta bai emozionalki ere. Hori eteten dugunean, ordea, haurrak ezinbestean behar duen ziurtasuna hautsi egiten da», agertu dute. Horiek hala, 0-3 zikloari merezi duen garrantzia emateko eskatu diote Udalari.
|
