«De Juanari zerbait gertatzen bazaio, PSOE izango da erantzule bakarra»
BAIONA
Preso gaixoak eta zigorra bete dutenak askatzeko eta euskal presoak herriratzeko gose-greban ari diren sei lagunek irmoki adierazi zuten, atzo, Baionan, Iñaki de Juanari «zerbait gertatzen bazaio, PSOE» izango dela «erantzule bakarra». Beren ekimenaren zergatiak azaldu eta su-etenaz geroztik, presoen egoerak «okerrera» egin duela adierazita, bereziki preso dauden bi herritarren egoera nabarmendu zuten:askatasun eskaera bitan errefusatu dioten Filipe Bidart baigorriarrarena eta gaixorik dagoen Juanjo Rego Vidalena, hain zuzen ere. Egunotan egindako lanari buruzko xehetasunak eman zituzten, bestalde. Hala, Ibaetako Foroaren kide diren ELB, LAB, CNT-AIT, Anai Artea, EHE, AEK, EK, Lapurtarren Biltzarra, Pilotarien elkartea, Segi, AC!, Emazteek diote eta Bilgune Feminista erakundeetako ordezkariekin bilkurak izan dituzte presoen aldeko konpromisoak finkatu eta, batez ere, hilaren azken ostiraletako mobilizazioak indartzeko. Gaur bertan, hautetsi abertzaleekin dute hitzordua xede bertsuarekin.
Kale-ekimenak
Kale-mobilizazioei dagokienez, dei egin zuten arratsaldeko 19.00etan Baionako Jean Dauger zelaian elkarretaratzera. Izan ere, gaur Aviron Baionakoak eta Biarritz Olympiquek errubgi derbia dute eta, jende asko bertaratuko denez, aukera baliatu nahi dute presoen egoeraz informatzeko eta haien eskubideen urraketa salatzeko. Bihar eguerdiko 12.00etan Saint Andre plazatik abiatuko den manifestazioarekin emango diote amaiera Lapurdin egin duten gose-grebaren txandari. Datorren astean, hiru eskualdek hartuko dute urrian hasitako protestaldiaren lekukoa Durangaldeak, Tolosaldeak eta Oiartzualdeak eta abenduaren 9tik 16ra Nafarroa Beherean Baigorrin izango da.
|
